د ملګرو ملتونو امنیت شورا د دوشنبې ورځ ناوخته (د ۱۴۰۳ کال د سلواغې پر ۲۲ مه) د داعش ډلې د ګواښونو په تړاو ځانګړې ناسته وکړه.
په دې ناسته کې د امریکا، روسیې، چین، بریټانیا او فرانسې پر پنځو دایمي غړيو هېوادونو سربېره د دې شورا ۱۰ نورو نوبتي غړیو هېوادونو د دایمي استازو ترڅنګ، د ترهګرۍ ضد مبارزې برخه کې د ملګرو ملتونو د سرمنشي مرستیال څرګندونې درلودې او پر نړیواله کچه يې د داعش او نورو ډلو پر حضور او فعالیت اندېښنه وښوده.
د ملګرو ملتونو د سرمنشي مرستیال ولادیمیر ورونکوف وايي، داعش خراسان څانګې د افغانستان ترڅنګ په اروپا کې هم د وسله والو عملیاتو د پلانولو هڅه کړې او د امنیت شورا پر غړیو هېوادونو يې غږ وکړ چې اجازه ورنه کړي، څو دغه ډله په افغانستان او سیمه کې خپلو ترهګریزو فعالیتونو ته ادامه ورکړي.
هغه زیاته کړې:« د داعش خراسان ډله په افغانستان، سیمه او نړۍ کې لوی ګواښ دی. په افغانستان کې پر ځینو عملیاتو سربېره یادې ډلې په اروپا کې د ترهګریزو بریدونو د ترتیبولو هڅه کړې او د مرکزي آسیا له هېوادونو یې هم کسان جذب کړې دي. د دې ترڅنګ، د داعش ځینې بهرني جنګیالي هم افغانستان ته سفر کولو ته دوام ورکوي. زه یو ځل بیا ټینګار کوم چې د امنیت شورا غړي باید دا اجازه ورنه کړي چې افغانستان بیا ځلې د ترهګريزو فعالیتونو پر خوندي مرکز بدل شی.»
د امنیت شورا په غونډه کې د روسیې استازي خبرو ته ورته د امریکا استازې هم د داعش د حضور پیاوړي کېدو او قابلیتونو لوړېدو ته اندېښنه ښودلې او افغانستان او پاکستان یې د دې ډلې د جلب او جذب عمده هېوادونه بللي.
په ملګرو ملتونو کې د امریکا د دايمي استازي مرستیاله ډروټي شې وايي: « موږ د بریدونو په ترسره کېدو کې د داعش خراسان څانګې له پیاوړتیاوو او په ځانګړي ډول په افغانستان او پاکستان کې د دې ډلې سربازګیرۍ او جلب او حذب ته اندېښنه لرو.»
بل پلو، سره له دې چې په ملګرو ملتونو کې د روسیې دایمي استازی د داعش ورځ تر بلې ځواکمنېدل ناڅاپي او تصادفي نه ګڼي، بلکې ترڅنګ یې له نړۍ غواړي چې باید د افغانستان وضعیت له پامه ونه غورځوي.
واسلي نيبينزیا ادعا کوي چې کواګي له افغانستانه د امریکا بېړنۍ وتنه د دې لامل شوه چې یو شمېر وسلې او پوځي تجهیزات د داعش خراسان څانګې لاس ته ولوېږي.
نيبينزیا په دې اړه وايي:« موږ د افغانستان وضعیت له پامه نه شو غورځولی. د داعش خراسان څانګې زیاتېدونکی فعالیت تصادف نه دی. له افغانستانه په بېړنۍ وتنې سره ناټو هلته زیات شمېر وسلې او تجهیزات پرېښودل چې وروسته د داعش خراسان څانګې لاس ته ولوېدل.»
همدارنګه، امنیت شورا کې د چین استازي په افغانستان کې د ځینو وسله والو ډلو د شتون خبره کړې خو ترڅنګ یې د مبارزې لپاره له سرپرست حکومته د محسوس او رغنده ګام پورته کولو غوښتنه هم کړې. فو کونګ دغه راز له ترهګرۍ سره د ګډې مبارزې لپاره د چین پر دوامدار ملاتړ ټینګار کړی.
هغه زیاته کړې: « چین د افغانستان پر سرپرست حکومت غږ کوي چې په افغانستان کې د ترهګرو ډلو له منځه وړلو په برخه کې محسوس او رغنده ګامونه پورته کړي. چین د منځنۍ آسیا او د شانګهای همکاریو سازمان له هېوادونو افغانستان سره د همکاریو د ودې په برخه کې ملاتړ کوي، ترڅو ترهګریزو ګواښونو ته په ګډه رسېدنه وشي.»
په ملګرو ملتونو کې د پاکستان دایمي استازي یو ځل بیا ادعا کړې چې د ټي.ټي.پي او داعش په ګډون په افغانستان څه باندې ش۲۰ وسله والې ډلې فعالیت لري.
منیراکرم تور لګولی چې افغانستان د داعش خراسان ډلې د جلب او جذب اصلي مرکز دی.
منیر اکرم ترهګریز فعالیتونه نه یوازې د افغانستان او پاکستان بلکې د سیمې او نړۍ امنیت لپاره لوی ګواښ ګڼلي.
هغه زیاته کړې:« څه باندې ۲۰ ترهګرې ډلې دا مهال په افغانستان کې فعالیت لري. دغه راز د ملګرو ملتونو د ارزونې ډلې راپور پر اساس، زه غواړم بیا ځلې تکرار کړم چې افغانستان د داعش خراسان څانګې د جلب او جذب او اسانتیاوو برابرولو اصلي مرکز دی. ترڅنګ یې موږ په پاکستان کې د داعش ډلې جلب او جذب په تړاو ټول تورونه ردوو.»
ومو غوښتل د یادو هېوادونو ادعاوو ته د اسلامي امارت غبرګونه هم له ځان سره ولرو؛ خو له اړیکو سربېره د راپور تر لیکلو پورې د حکومت د نظر په لرلو بریالي نه شوو.
په افغانستان کې د داعش د حضور او فعالیت په تړاو د هېوادونو د اندېښنو له مطرح کېدو وړاندې اسلامي امارت ویلي و چې په تېرو نږدې څلورو کالونو کې یې په یوازې سر له داعش خرسان څانګې سره جدي مبارزه کړې او د دې ډلې لسګونه غړيو پر وژلو سربېره يې ګڼ شمېر نور غړي چې په کې د پاکستان او تاجیکستان اتباع شامل دي، نیولي دي.
