د ملګرو ملتونو امنیت شورا په روانه سپټمبر میاشت کې د افغانستان په تړاو د یوې ځانګړې غونډې د جوړېدو خبر ورکوي.
د امنیت شورا له لوري په خپره شوې خبرپاڼه کې ویل شوي، چې په دې ناسته کې به د افغانستان لپاره د ملګرو ملتونو ځانګړې استازې روزا اتونبایوا چې په ورته مهال په افغانستان د ملګرو ملتونو د سیاسي استازولۍ (یوناما) مشري هم کوي، د دې سازمان د ښځو چارو برخې اجرائیه مشرې سیما سمېع باهوس سره یو ځای د افغانستان د وضعيت په اړه خپل درې میاشتنی راپور وړاندې کړي.
د راپور یوه برخه: « امنیت شورا به روانه سپټمبر میاشت کې د افغانستان په تړاو ناسته ترسره کړي. ټاکل شوې، په دې ناسته کې د ملګرو ملتونو د سرمنشي ځانګړې استازې او د یوناما مشره روزا اتونبایوا، د دې سازمان د ښځو برخې اجرائيه رییسه سیما باهوس او ورسره د مدني ټولنې یو شمېر استازي ګډون ولري او د افغانستان په تړاو به معلومات وړاندې کړي.»
بل پلو، ملګرو ملتونو کې د سلوونیا هېواد دایمي استازولۍ په یوې خبرپاڼه کې ویلي، د دې ناستې مشري د یاد هېواد لومړي وزیر مرستیاله تانجافجون کوي او د بحث اصلي موضوع به په افغانستان کې د نجونو زده کړې او د ښځو چارو اړوند مسایل وي.
د خبرپاڼې یوه برخه: « د سپټمبر پر ۱۸ به د لومړي وزیر مرستیاله او د بهرنیو او اروپايي چارو وزیره تانجا فاجون د افغانستان په تړاو د ملګرو ملتونو د یوې ناستې مشري وکړي، چې ځانګړی تمرکز به یې د نجونو زده کړې او د ښځو اړوند مسایل وي.»
د ښځو د حقونو مساله هغه موضوع ده، چې په تېرو څه باندې درېیو کلونو کې د ملګرو ملتونو سازمان پرې ګڼې ناستې ترسره کړې او هر ځل له سرپرست حکومت څخه د ښځو حقونو ته د درناوي او د مشروع حقونو د ورکړې غوښتنه شوې.
که څه هم اسلامي امارت د دې ناستې په تړاو څه نه دي ویلي، خو له دې وړاندې یې په افغانستان کې د ښځو او زده کړو مسایل د افغانستان کورنۍ ستونزې بللې او نړیوالې ټولنې ته یې د لاسوهنې نه کولو سپارښتنه کړې.
د سیاسي چارو کارپوه خلیل احمد نادم وايي: « طالبان له خپل سیاست څخه نه تېریږي؛ دوی د ښځو ښوونځي او پوهنتونه بند کړي او د کار اجازه نه ورکوي. دا هغه څه دي چې دوی یې نه ورکوي خو ولس او ملګري ملتونه یې ترې غواړي. زه فکر نه کوم، دا ځل هم د ملګرو ملتونو غونډه څه پایله ولري.»
خو ملګري ملتونه او په کابل کې د دوی استازولي (یوناما) د نجونو د زده کړو او ښځو د حقونو موضوع کورنۍ ستونزه نه بولي او بشري حقونه یې ګڼي.
یوناما په دې تړاو د اوسني سرپرست حکومت محدودیتونه له بشري حقونو سرغړونه د نړیوالو کنوانسیونونو او اصولو خلاف کړنه بولي.
د سیاسي چارو شنونکي د نړیوالې ټولنې او سرپرست حکومت ترمنځ اړیکو او د بشري حقونو په څېر پر واحده موضوع د نظر اختلاف ته په کتو، که څه هم د دې ناستې پایلو ته خوشبین نه دي، خو د نړیوالې ټولنې د یوه غړي په توګه د افغانستان پر موضوعاتو ورته بحثونه د اهمیت او ګټې وړ بولي.
د سیاسي چارو شنوونکی شهسوار سنګروال وايي: « زه فکر کوم ملګري ملتونه به بیا په تېرو غوښتنو ټینګار وکړي او له طالبانو به وغواړي چې د نړۍ لپاره د اندېښنې وړ مسایلو په تړاو کوټلي ګامونه پورته کړي. بله خبره د اسلامي امارت د امربالمعروف قانون دی چې د نړۍ له غبرګون سره مخ شو. زه فکر نه کوم په دې اړه څه خوشبیني موجوده وي، خو بیا هم هره ناسته افغانستان ته ګټه لري او دا ثابتوي چې نړۍ لاهم افغانستان نه دی هېر کړی.»
د امنیت شورا دا غونډه داسې مهال رابلل شوې چې همدې شورا څو میاشتې وړاندې هم د سویس په کوربتوب او د متحده عرب اماراتو او جاپان په ملاتړ د بندو دروازو ترشا د « افغانستان په اړه د ښځو لیدلوري» تر نامه لاندې ناسته وکړه چې په کې په افغانستان کې د نجونو د زده کړو، د ښځو حقونو او د هغوی پر وړاندې پرتو خنډونو او محدودیتونو په تړاو بحثونه وشول، خو هېڅ مثبت اغېز یې ونه لیدل شو.
