د ملګرو ملتونو د امنیت شورا د پنجشنبې پر ورځ (د ۱۴۰۳ کال د لیندۍ پر ۲۲) ناستې په څنډه کې ۱۴ هېوادونو د یوې ګډې اعلامیې په خپرولو سره اسلامي امارت په افغانستان کې د ښځو او نجونو له بنسټیزو حقونو او د بشري حقونو په سیستماتیکې سرغړونې تورن کړ.
اعلامیه کې تر شپږم ټولګي پورته د نجونو د زده کړو ځنډول، د نجونو پر مخ د پوهنتونونو تړل، د ښځو نجونو لپاره د طبي موسسو بندول او د سرپرست حکومت له خوا د ښځو پر کار محدوديتونه ياد شوي دي.
په اعلامیه کې همداراز ویل شوي، د اسلامي امارت د واکمنۍ په درې کلنه موده کې تر ۸۰ زیات فرمانونه صادر شوي چې په دې هېواد کې د بشري حقونو د ښکاره نقض څرګندونه کوي.
د اعلامیې یوه برخه:« موږ د دې اعلامیې له لارې له اسلامي امارت غواړو چې د افغانستان د نړیوالو مکلفیتونو، په ځانګړې توګه د بشر حقونو د نړیوالې اعلامیې او د ملګرو ملتونو د امنیت شورا د ۱۳۲۵ ګڼه پریکړه لیک په ګډون د ښځو د حقونو، سولې او امنیت په اړه د ملګرو ملتونو د امنیت شورا ټولو پریکړو ته درناوی وکړي.»
ورته مهال، په کابل کې د ملګرو ملتونو د سیاسي استازولۍ (یوناما) مشرې خبرداری ورکړی، که سرپرست حکومت د نجونو پر زده کړو بشپړ بندیز ولګوي، دا پرېکړه به نه یوازې د نجونو بلکې د هېواد د نارینه وو لپاره هم ناوړه پایلې ولري.
روزا اتونبایوا زیاته کړې: « په روغتيايي ښوونيزو مرکزونو کې د ښځو د زده کړو بندیز په تړاو وروستی حکم په افغانستان کې د روغتيايي خدمتونو سيستم لا زيات زيانمنولی شي او نه يوازې د ښځو او نجونو بلکې د نارينه وو او هلکانو لپاره هم بدې پایلې لرلی شي.»
د اسلامي امارت ویاند ذبیح الله مجاهد دغو څرګندونو ته په غبرګون کې ویلي، په افغانستان کې د ټولو اتباعو حقونه د اسلامي شریعت په چوکاټ کې خوندي دي.
مجاهد یوځل بیا له نړۍ غوښتي چې ورته موضوعات د اسلام له نظره و ارزوي.
هغه زیاته کړې: « بشري حقونه باید له افغاني او اسلامي دید محاسبه شي. اروپايي او امریکايي هېوادونه یا نوره نړۍ د حقونو تعریف د خپل ځانګړي فرهنګ او باور له مخې کوي. هغوی باید افغانستان ته له خپل دید ونه ګوري باید افغانستان ته د افغانستان له دید او اسلامي اصولو له مخې ولیدل شي. دلته د هېچا حق نه دی تلف شوی مګر دا چې وویل شي افغانستان اروپا ده او اروپا کې چې خلک کوم حقونه لري باید افغانستان کې هم ورکړل شي؛ دا نو د افغانستان پر فرهنګ، دود او کلتور یو ډول تېری دی، د افغانستان له اعتقاداتو سره ګستاخي ده او موږ ته د منلو وړ نه ده.»
په همدې حال کې د سیاسي چارو کارپوهان وايي، د افغانستان داخلي ستونزې باید افغانان په خپله حل کړي او پر نړیوالو یې غږ کړی چې اسلامي امارت پر رسمیت وپيژني.
د سیاسي چارو کارپوه سمیر انګار وايي: « په داخلي کچه یو شمېر ستونزې شته دي خو دا ستونزې باید د یوې کورنۍ جرګې له لارې خپله د افغانانو له خوا حل او فصل شي. له هغې وروسته باید دېته زمینه برابره شي چې د نړۍ له خوا د رسمیت پېژندلو په اړه بحثونه ولرو.»
د پنجشنبې ورځې په ماښام د امریکا، فرانسې، بریتانیا، جاپان، اکوادور، مالټا، یونان، ډنمارک، پاناما، ګیانا، سیرالیون، سلووینیا، سویس او جنوبي کوریا هېوادونو په افغانستان کې د اسلامي امارت له خوا د بشري حقونو د سرغړونې په اړه یوه ګډه اعلامیه د ملګرو ملتونو امنیت شورا ته وړاندې کړه.
