د روان ۲۰۲۵ کال د مې پر ۱۳ مه د امریکا کورني امنیت وزارت چارواکو د شاوخوا ۱۲ زره افغانانو په ګډون، د ټولو هېوادونو اړوند کډوالو لپاره د لنډ مهاله مېشتېدنې پروګرام(ټي.پي.اېس) لغوه او د جولای ۱۴مه یې د هغوی د اخراجولو لپاره وروستی ضرب الاجل وټاکه.
دغه پرېکړه چې د ولسمشر ډونالډ ټرمپ په امر شوې، اوس یې تطبيق د کاسا په نوم د کډوالۍ ملاتړي سازمان د هڅو په پایله کې ځنډول شوی دی.
په دې تړاو د امریکا په ویرجینیا ایالت کې د څلورمې دورې استیناف محکمې د جورج ټاون پوهنتون قانون انسټیټيوټ له لوري ورسپارل شوې حقوقي قضیه تعقیب کړې چې له مخې يې د ټرمپ ادارې له لوري د ورکړل شوي ضرب الاجل نېټه د جولای تر ۲۱ نېټې غځول شوې ده.
په جورج ټاون پوهنتون کې د قانون انسټیټيوټ ارشد سلاکار سامویېل سیګل ویلي: « محکمې ومنله چې د کامرون او افغان کډوالو لپاره د ټي.پي.اېس پروګرام لغوه کول غیر قانوني دي. دا پرېکړه هغوی او د هغوی کورنیو ته ستر زیان دی.»
خو دغه پروسه چې د کاسا په نوم د کډوالۍ ملاتړي سازمان له لوري څارل کېږي، لاهم د امریکا د کورني امنیت وزارت له جدي ننګونو سره مخ ده.
د دې سازمان د ملي اړیکو مشرې جوسي فلور ساپونار سي.بي.اېس ټلوېزيون ته ویلي، په موقتي توګه د یادې محکمې پرېکړه به په امریکا کې د دایمي مېشتېدنې لپاره د افغان او کامروني کډوالو کورنیو پاتې کېدو ته زمینه برابره کړي.
هغې زیاته کړې:« که څه هم د محکمې پرېکړه لنډمهاله ده، خو هره شېبه د دې لپاره مهمه ده چې د کورنیو برخلیک په کې څرګندېږي.»
د دې ترڅنګ، په امریکا کې د افغانانو د مېشتېدنې بنسټ ریيس، شان وان ډایور رسنیو ته په خبرو کې د ټي.پي.اېس لنډمهاله ځنډېدو ملاتړ کړی او له اړوند امریکايي ادارو یې غوښتي چې د هغو افغانانو د مېشتېدنې اجازه ورکړي چې په افغانستان کې یې د امریکا له ماموريت سره همکاري کړې.
د کډوالو د حقونو مدافعان بيا وايي، امریکا دې له افغان کډوالو سره توپیري چلن پای ته ورسوي او په خبره يې، د دې هېواد چارواکي دې د نورو هېوادونو د کډوالو په څېر افغانانو ته هم د کډوالۍ حقوق ورکړي.
د کډوالو د حقونو مدافع محمد خان طالبي محمدزی وايي: « دا خپله یو خطرناک اقدام او د بشري حقونو نقض دی. د امریکا دولت باید په خپلو نړیوالو تعهداتو عمل وکړي، د انساني کرامت ساتنه او پر خپلو سختګیرانه سیاستونو بیاکتنه وکړي.»
د امریکا کورني امنیت وزیرې کرستي نوم شاوخوا دوه میاشتې وړاندې په دې هېواد کې د بهرنیو وګړو لپاره د لنډمهاله مېشتېدنې پروګرام پای ته رسېدلی اعلان کړ.
نوموړې هغه مهال د افغان کډوالو د پاتې کېدو په غبرګون کې ویلي و چې اوس مهال افغانستان امن دی، اقتصادي وده یې کړې او امريکا کې د افغان کډوالو پاتې کېدو لپاره هېڅ ډول پلمه نه شته.
