د امریکا د بهرنیو چارو وزیر مارکو روبیو له یوې کاناډايۍ (کاترین هیریج) په نوم اېکس رسنۍ سره تازه مرکه کې د نړۍ په ځینو هېوادونو کې د القاعده او داعش وسلهوالې ډلې د فعالیتونو، د نړۍ امنیت او سولې ته د احتمالي ګواښونو او نورو مهمو مسایلو پوښتنې ځواب کړې دي.
روبیو د دې پوښتنې په ځواب کې چې ایا القاعده او داعش په افغانستان کې یو داسې خوندي پټنځای موندلی چې ۲۰۰۱ کال د سپټمبر له ۱۱ مخکې وضعیت سره ورته وي؟
روبیو د دې پوښتنې په ځواب کې ویلي:« زه دا د سپټمبر ۱۱ مې مخکې وضعیت سره نه شم پرتله کولی. خو زما په اند، هر ځل چې حکومتولي لانجمنه شوې، یا یو حکومت د خپل ټول قلمرو پر هرې برخې بشپړ کنټرول ونه لري، دا دغو ډلو یعنې (القاعدې او داعش ) لپاره یوه موقع کېدای شي. د نن او ۱۰ کاله مخکې ترمنځ توپیر دا دی چې امریکا هلته پوځي حضور نه لري چې دوی تعقیب او هدف وګرځوي.»
د امریکا دغه لوړپوړی چارواکی په افغانستان کې د بهرنیو وسلهوالو ډلو د عدم حضور او احتمالي ګواښونو په تړاو دغه څرګندونې داسې مهال کوي چې څو میاشتې وړاندې د جوبایډن ادارې ځینو چارواکو او د دې هېواد د کانګرس یو شمېر غړو افغانستان د وسلهوالو او ترهګرو ډلو لپاره خوندي ځای بللی و.
خو د ډونالډ ټرمپ پر مشرۍ د امریکا حکومت د بهرنیو چارو وزیر مارکو روبیو په افغانستان کې د وسلهوالو ډلو پر وړاندې د اسلاميامارت دریځ قوي بللی دی.
په ورته وخت کې د سیاسي چارو کارپوهان امریکا او په سیمه کې د دې هېواد متحدین د امریکا او ناټو د پوځي حضور له پایته رسېدو وروسته د داعش خراسان ډلې په انسجام، روزنه او تمویل تورنوي.
د سیاسي چارو کارپوه اختر محمد راسخ وايي:« زه دا ویلی شم چې د داعش لپاره خپله غربي نړۍ او په ځانګړي ډول د پاکستان استخبارات موظف شوې چې دوی (داعش) ته په سیمه کې او نړۍ کې لابي ګیري وکړي او د داعش د جګړو لمنه پراخه کړي.»
دامریکا بهرنیو چارو وزیر د داعش ډلې د فعالیتونو په تړاو د یوې پوښتنې په ځواب کې ویلي، دا ډله تل داسې بې ثباته سیمې لټوي چې دوی ترې بریدونه پلانولی شي او په خبره یې ځينې سیمې لاهم افغانستان کې شته چې اسلامي امارت پرې حاکمیت نه لري.
اسلاميامارت د مارکو روبیو د څرګندونو او دافغانستان په تړاو ادعاوې رد او تائيد نه کړې، خو د سیاسي چارو کارپوهان وايي، اسلاميامارت په ټول افغانستان بشپړ حاکمیت لري او د دولت وسلهوال مخالفین یې ځپلي دي.
د سیاسي چارو کارپوه شهسوار سنګروال وايي:«په دې شک نه شته دی چې په افغانستان کې یو شمېر سیاسي او اقتصادي ستونزې موجودې دي. ولې څومره چې د امنیت مساله ده، زه فکر کوم د سردار محمد داوود خان له واکمنۍ وروسته هغه سراسري سوله چې په ټول افغانستان کې موجوده ده او یا هغه باثباته مرکزي حکومت چې اوس په افغانستان کی شتون لري، زه فکر نه کوم چې دا د ۴۰ کلونو په شاوخوا کې دې دا ډول یو باثباته مرکزي حکومت تېر شوی وي.»
د امریکا بهرنیو چارو وزیر مارکو روبیو په خپله تازه مرکه کې یوازې د افغانستان، سوریې او یو شمیر افریقايي هېوادونو په تړاو د داعش فعالیتونو او موجودیت په تړاو پوښتنې ځواب کړي او په خبره یې دا وضعیت یې یوازې افغانستان پورې محدود نه دی بللی.
نوموړي اندېښنه ښودلې چې سوریه کې د بشارالاسد د حکومت له ړنګیدو سره هلته د داعش ډلې په زرګونه جنګیالي زندانونو کې ساتل کیږي او د احتمالي سیاسي بېثباتیو له امله به د نړۍ امنیت وننګوي چې دا زموږ لپاره اوس یوه اندېښنه ده.
