د امریکا بهرنیو چارو وزارت وايي، لا هم په افغانستان کې د ترهګرو د شتون په اړه اندېښنه لري او له سرپرست حکومت یې غوښتي، چې د ترهګرۍ مخنیوي په برخه کې له جدیت څځه کار واخلي.
د یاد وزارت ویاند متیو مېلر وايي ،امریکا په سیمه کې د ترهګرۍ ګواښونه څاري او د احتمالي ګواښونو د پېښېدو په صورت کې به سملاسي لاس په کار شي.
مېلر زیاته کړې:« د ترهګرو پر شتون او د بشري حقونو پر نه خوندیوب اندېښمن یو او له طالبانو غواړو چې په دې برخه کې جدي ګامونه پورته کړي. امریکا په افغانستان کې ترهګر څاري او د احتمالي ګواښ پر وړاندې یې چمتوالی لري.»
بل خوا د افغانستان لپاره د امریکا ځانګړی استازی توماس وېسټ وايي، د دوحې فورم د ناستې په څنډه کې يې د افغانستان له بېلا بېلو لوریو سره خبرې ګټورې وې.
هغه زیاتوي:« د افغانستان په تړاو د قطر او ملګرو ملتونو له چارواکو سره خبرې هېله بښونکې وې او هم نوښتګر افغانان د نجونو او هلکانو تعلیم ته پوره ژمنتیا لري.»
د سیاسي چارو یو شمېر کارپوهان وايي، امریکا د خپلو ګټو د خوندیتوب لپاره هر وخت ضد ونقيض ادعاوې لري او هڅه کوي، په دې ډول پر سرپرست حکومت خپل فشار دوامدار وساتي.
دوی ټینګار کوي چې بشري حقونه او په ځانګړي ډول د نجونو او مېرمنو زده کړې او کار د افغانانو مسلم حق دی چې باید سرپرست حکومت یې ورکړي.
د سیاسي چارو کارپوه عزیز معارج وايي: « امریکا د خپلې پالېسۍ، پرګرام او پروژې پر بنسټ غواړي پر طالبانو یو ډول نه یو ډول فشار راوړي او خپلې غوښتنې پرې ومني؛ نو طالبانو ته په کار ده چې کله د ترهګرۍ غږ پورته کېږي نو دوی باید ډاډ ورکړي او په دې هکله کوټلي ګامونه پورته کړي. د نجونو او ښځو د حقونو په تړاو امریکا او نړۍ په حقه ده، ځکه دلته موږ ګورو چې د نجونو ښوونځي تړل شوې دي او ښځو ته د کار حق نه ورکول کېږي؛ نو هېله ده چې طالبان په دې هکله شرعي او قانوني د یوه نظام په توګه اقدام وکړي او د دوی حقوق تامین کړي، بیا به نو دا پلمې نورې پاتې نه شي.»
د سیاسي چارو کارپوه شهسوار سنګروال وايي: « امریکا د سیاسي فشار په توګه دا خبره کوي چې اوس هم په افغانستان کې د ترهګرۍ وېره شته او غواړي نړۍ ته وښيي چې موږ د همدې لپاره افغانستان یا اسلامي امارت په رسمیت نه پېژنو چې یو ستر لامل یې د ترهګرۍ شتون دی، ځکه نړۍ خو له دوی(امریکا) پوښتنه کوي نو چې دا پلمه ونه کړي نور به څه ځواب ولري.»
اسلامي امارت تل د ترهګریزو ګواښونو ادعاوې بې بنسټه بللې او ویلي دي، هېچا ته اجازه نه ورکوي چې د افغانستان خاوره د نورو پر وړاندې وکارول شي او د بشري حقونو موضوع یې د افغانانو کورنۍ مسله یاده کړې.
