غرب کې تر بل هر وخت له افغانستان څخه د امریکايي ځواکونو د وتلو مسله ګرمه ده او ټرمپ یوازینی کس ښودل کیږي چې خپل ځواکونه له افغانستان څخه غوښتلی شي.
له دې سره ملي دفاع وزارت ډاډه دی چې ځواکونه یې پر ځان بسیا شوي او د بهرنیو ځواکونو وتل وضعیت باندې اغیز نه کوي.
له افغانستان څخه د بهرنیو ځواکونو د وتلو د مکررو غوښتنو په دوام پخواني متقاعدین هم د دې پلوي دي چې له افغانستان څخه امریکايي ځواکونه و ایستل شي.
دغه پخوانی پوځي وايي، دوی د همدې لپاره ټرمپ ته رایه ورکړې تر څو له افغانستان څخه امریکايي ځواکونه وباسي.
امریکايي متقاعد پوځي جنرال دوګلاس مک ګرېګور داسې وویل (( یوازې یو کس دی چې کولای شي دا جګړه پای ته ورسوي. دا نوم ډونالډ ټرمپ دی. هغه ژمنه کړې وه چې ډیر مخکې باید دغه جګړه ختمه کړي خو ټرمپ موږ ناهیلي کړو ځکه هغه دا کار و نه کړ. ټرمپ اړ دی چې له افغانستان ځواکونه وباسي، همدې لپاره ورته موږ رایه ورکړې ده))
امریکايي چارواکو ان تر ولسمشر ټرمپ پورې ویلي چې دوی له افغانستان څخه خپل ځواکونه کموي او شمېر یې تر اتو زرو را ښکته کوي.
دلته په کور دننه هم د بهرنیو ځواکونو د وتلو لپاره تشویش نه ښکاري، دفاع وزارت ډاډه دی چې افغان ځواکونو ښې وړتیاوې پيدا کړي او په ځان تکیه دي.
له افغانستان څخه په دې حساس وخت کې د امریکايي عسکرو وتل له طالبانو سره د سولې خبرو او یا د هغوی له فشار سره تړاو ورکول کیږي.
تېره ورځ د امریکا د ملي امنیت شورا سلاکار ویلي و، چې د امریکايي ځواکونو کمښت او وتل د سولې له پروسې سره هیڅ راز تړاو نلري او که دا خبرې بریالۍ او یا ناکامې شي دوی خپل ځواکونه له افغانستان څخه باسي.
