په کور دننه او بهر پر افغانستان د پاکستان د دوشنبې شپې هوايي بريدونو پراخه غندنه له دې کبله دوام لري، چې د افغانستان ځمکنۍ بشپړتیا پر نقضولو سربېره په کې ملکي وګړي پر نښه شوي دي.
امریکا هم د پاکستان له لوري په ترسره شویو يادو بريدونو کې د ملکيانو په اړه د اندېښنې په ښودلو سره، عامو خلکو ته د مرګ ژوبلې اوښتل تائيد کړي.
امريکايي چارواکو وضعيت ته په کتو له کابل او اسلاماباد د زغم غوښتنه کړې او په ځانګړې توګه يې پر پاکستان غږ کړی چې د ترهګرۍ ضد عملياتو په پلمه په خپلو تحرکاتو کې د ملکي وګړو خونديتوب ته پام وکړئ.
د امریکا بهرنیو چارو وزارت د ویاند مرستیال ودانټ پټېل وايي:« له افغانستان سره په ګاونډ شمالي وزیرستان کې د یوه برید په لړ کې د ملکي وګړو د مرګ ژوبلې او په افغانستان کې د هوايي برید په پایله کې د ولسي وګړو پر وژل کېدو ژور خواشینې یو. موږ پر طالبانو غږ کوو، چې ډاډ ترلاسه کړي د افغانستان له خاورې څخه ترهګریز بریدونه نه کېږي او له پاکستان غواړو، چې له زغم څخه کار واخلي او ډاډ ترلاسه کړي، چې د دوی د ترهګرۍ ضد هڅو کې ملکي وګړو ته زیان نه رسېږي.»
د پاکستان بهرنیو چارو وزارت هم په دې اړه خپره کړې اعلاميه کې ویلي، چې د افغانستان پر خاوره د دوشنبې سهار په بریدونو کې د تحريک طالبان پاکستان ډلې د یوه قوماندان حافظ ګل بهادر ډله په نښه شوې ده.
په اعلاميه کې راغلي، چې په افغانستان کې وسلهوالو ډلو له هغې ډلې ټيټيپي پر پاکستان د بریدونو لپاره تل له افغان خاورې استفاده کړې.
د اعلامیې یوه برخه:« د پاکستان بهرنيو چارو وزارت په افغانستان کې د پکتيکا او خوست ولايتونو پر يو شمېر برخو د دې هېواد هوايي بريدونه تائيدوي. د دې بريدونو اصلي موخه له حافظ ګل بهادر ډلې سره تړلي ترهګر وو، حافظ ګل بهادر ډله له تحريک طالبان پاکستان سره يو ځای د پاکستان په خاوره کې د ګڼو وسله والو بريدونو او د سلګونو ملکي او نظامي وګړو د وژنې مسووله ده.»
خو تحريک طالبان پاکستان بيا د عبدالله شاه په نوم د خپل هغه قوماندان ويډيويي پيغام خپور کړی، چې پاکستان يې په هوايي بريدونو کې په نښه کولو ادعا کړې.
عبدالله شاه په دې پيغام کې خپل موقعيت سوېلي وزیرستان ښيي او د پاکستاني ادعاوې پروپاګنډ بولي چې ګواکې نوموړی په افغانستان کې دی.
اسلامي امارت د پاکستان دا بریدونه د افغانستان پر حریم تېری او غیرې سنجیده اقدام بولي.
د اسلامي امارت ویاند ذبیح الله مجاهد وايي، پاکستان باید په خپله خاوره کې د پېښو د نه کنټرول ناتواني او د ستونزو پړه دې پر افغانستان نه اچوي، ځکه د دوی پر باور دا کار بدې پايلې لرلی شي.
هغه زیاته کړې:« اوس هم د افغانستان دغه درېځ دی، چې خاوره یې نه د چا پر ضد کارول شوې او نه د کارول کېدو اجازه لري. اسلامي امارت په دې اړه خپل مسوولیت ادا کړی او نور هېوادونه هم باید بهانه جويي ونه کړي او په ناسمه توګه د افغانستان له حریم سره بې احتیاطي ونه کړي چې بیا به ګرانه تمامه شي.»
د سیاسي او نړۍوالو اړیکو کارپوهان د پاکستان وروستی تېری د ټولو نړیوالو نورمونو او قوانینو خلاف عمل بولي او زیاتوي، پاکستان دې د افغانستان ځمکنۍ بشپړتیا ته درناوی ولري ځکه د دوی په باور یې افغانان بیا د ملي ګټو او خاورې باندې تېری هېڅکله نه زغمي.
سرچینې وایي وايي، له تېرې شپې راهيسې پکتيا، خوست او پکتيکا ولايتونو کې ډيورنډ فرضي کرښې ته څېرمه له پاکستاني لوري سره د افغانستان د پوله ساتو ځواکونو نښتې درېدلې دي.
سرچینې زیاتوي،د پکتيا په ډنډپټان ولسوالۍ کې جګړه، د پاکستاني لوري او قومي مشرانو په منځګړيتوب درېدلې، خو په نورو ولايتونو کې د جګړې درېدلو لامل لا نه دی روښانه، د مالوماتو پر اساس چې د اسلامي امارت ځواکونه لا هم د تيارسۍ په حالت کې دي.
