امریکا د افغانستان د امنیتي او دفاعي ځواکونو د ملاتړ لپاره ځانګړې شوې بودیجه شپږ سوه او څلور ميلیونه ډالره کموي.
یو شمېر نظامي کارپوهان وایي، که امریکا پر افغان ځواکونو بودیجه کمه کړي بدې پایلې به ولري.
افغانستان په اوس کې له جګړې سره مخ او کمزوری اقتصاد لري، چې د ځواکونو د اکمالاتو او تجهیز لپاره کافي پیسو ته اړتیا لري.
ملي دفاع وزارت او د ملي امنیت شورا په دې اړه له څه ویلو ډډه وکړه.
د امریکا دفاع وزارت په پلان کې لري چې د هغه یو اعشاریه پنځه ميلیارده ډالر چې په ۲۰۱۹ کال کې افغانستان کې د امنیتي ځواکونو د ملاتړ په ګډون د یو شمېر پروژو لپاره ځانګړي شوي دي، له شمېر یې شپږ سوه او څلور میلیونه ډالر له مکسیکو سره پر ګډه پوله د دېوال پر جوړولو ولګوي.
د پنټاګون یو چارواکي داسې ویلي (( دا له افغانستان سره د امریکا د ژمنې له څرنګوالي سره هېڅ تړاو نه لري، بلکې حقیقت کې د ځینو پروژو لګښت د امریکا تر ارزونې کم و.))
ملي دفاع او امنیت شورا بیا د دې موضوع په تړاو چمتو نه و چې ځواب ووايي.
خو نظامي کارپوه عتیق الله امرخېل وایي، که امریکا پر افغان ځواکونو بودیجه کمه کړي بدې پایلې به ولري او د جګړې سربیره به د اکمالاتو او تجهیزاتو پر تکمیل او د سرتیرو په مورال بده اغیزه وکړي.
د شنونکو په باور امریکا نه غواړي افغانستان له نظامي اړخه ځواکمن هېواد شي او په لوی لاس غواړي افغانستان او د افغانستان ځواکونه کمزوري وي.
