د روسیې د بهرنیو استخباراتو مشر، سرګې نرېشکن ویلي چې د امریکا متحده ایالات به له افغانستانه یوه برخه ایستل شوی پوځ ګاونډیو هېوادونو کې مېشت کړي.
د سپوټینک د راپور له مخې، نرېشکن ویلي، دا ښکاره ده چې له افغانستانه د وتلو پر مهال متحده ایالات پر سیمه کنټرول له لاسه ور کول نه غواړي او د اراده شته چې لږ تر لږه یوه برخه پوځي وسایل چې اوس افغانستان کې دي، ګاونډیو هېوادونو کې ځای پر ځای کړي.
د نرېشکن پر باور، روسیه پر دې موضوع چې هڅې یې هم شوي دي، خبره ده.
نوموړي دغه راز هیله څرګنده کړې چې د دوی د ټولیز امنیتي تړون سازمان ملګري او شریکوال به له دې هڅو سره هوکړه و نه کړي.
له دې مخکې وال سټریټ ژورنال هم خبر ور کړی و چې متحده ایالات ښايي له افغانستانه ایستل شوي پوځیان په ازبکستان او تاجکستان کې مېشت کړي؛ خو تر اوسه هوکړه پرې نه ده شوې.
بلخوا بیا د سپوټنیک سره د مرکو پر مهال ځنې کار پوهانو ویلي چې تاشکند او دوشنبې له مسکو سره نږدې اړیکې لري او داسې نه ښکاري چې له دې موضوع سره هوکړه وکړي.
