د امریکا بهرنیو چارو وزارت ویاند نیډ پرایس په تازه څرګندونو کې د روسیې پر وړاندې سخت غبرګون وښود.
پرایس وايي، له افغانستانه د امریکا وتل په دې مانا نه دي،چې د روسیې په څېر هېوادونو ته دې د سر راپورته کولو فرصت پیدا شي او پیاوړي شي.
پرایس زیاتوي:«زه پر دې پوه نه شوم،چې له افغانستانه زموږ د ځواکونو وتل، د روسیې په څېر ځینو هېوادونو ته دا جرأت او پیاوړتیا څنګه ورکړه،چې هغوی سر راپورته کړي او ځینې غبرګونونه وښايي.»
اخوا د سیاي چارو یو شمېر کارپوهان بیا په دې اند دي،چې د امریکا له وتلو وروسته د روسیې دریځ دا دی،چې سیمه باید بې ثباته نه شي.
دوی په دې اند د ي،چې د افغانستان بې ثباتي د روسیې په زیان هم ده او هغوی مرکزي اسیا ته د ترهګرۍ له غځیدو وېره لري.
ځې نور بیا وايي، روسیه او امریکا د زبرځواکو هېوادونو په توګه له یو بل سره سترې سیاسي سیالۍ لري او هرځل چې په دواړو کې یو مات شوی، بل ورته طعنې ورکړي دي.
د سیاسي چارو کارپوه ادم خان اندړ وايي:« البته باید وویل شي،چې دا د دوی پخوانۍ ستونزې دي،چې خپل منځ کې یې لري. دوی سیالان دي. لومړی او دویم قدرت په نړۍ کې همدا دواړه هېوادونه دي، نو ځکه یې د افغانستان مو ضوع خپله موخه ګرځولې ده. دوی ( امریکا او روسیې ) خپل منځ کې سړه جګړه پر مخ بیايي.»
نیډ پرایس د خپلو خبرو په ترڅ کې دا هم ویلي،چې امریکا په افغانستان کې د شل کلنې جګړې له پای ته رسولو وروسته د روسیې او اکراین په څېر نړیوالو کړکیچونو ته هم ځان چمتو کړی دی.
