د سرپرست حکومت چارواکي وايي، امريکا د کورنيو چارو وزارت سرپرست خلیفه سراج الدين حقاني پر سر د مالوماتو ورکولو په تړاو لګول شوې جايزه لغوه کړې ده.
روېټرز خبري آژانس هم د ياد وزارت سرچينو له قوله د دې خبر پخلی کړی او وايي، خلیفه سراج الدین حقاني نور د امريکا له لوري د تعقيبېدونکو کسانو په نوملړ کې نه شته.
په دې اړه خپرو شویو راپورو کې راغلي، د سراجالدين حقاني ترڅنګ د نوموړي دوو نږدې همکارانو عبدالعزیز حقاني او یحیی حقاني نومونه هم د مطلوبو کسانو له نوملړه ايستل شوې دي.
د اسلامي امارت غړی حافظ انس حقاني وايي، د امریکا له لوري د حقاني او همکارانو نومونه د امريکا د جایزې له نوملړ لرې کول یو مثبت ګام دی او زياتوي چې له تور لېسته د سرپرست حکومت مشرانو ایستل هم د دوحې د هوکړې یوه برخه ده.
هغه په دې اړه وايي:« دا په سياسي ډګر کې يو مثبت اقدام دی. دا ستونزه د جګړو له وخته پاتې وه او اوس چې په افغانستان کې امن دی او موږ د دوحې تړون ته ژمن يو، نو د دې عمل اړتيا نه شته. لاهم د امارت پر پنځو نورو غړیو ايښودل شوې جایزې پر خپل ځای پاتې دي او موږ هيله لرو چې هغه هم لغوه شي. دا کار به د جګړې له وخته د افغانستان او امريکا تر منځ بندې لارې پرانیزي. اوس افغانستان کې امن دی او هېڅ هېواد ته ګواښ او خطر پېښ نه دی.»
د امریکا متحده ایالتونو تر اوسه په دې اړه څه نه دي ويلي او د دې هېواد د فډرالي پلټنو ادرې (اېف.بي.آی) پر وېب پاڼه لاهم د سراج الدين حقاني په تړاو د مالوماتو ورکولو ۱۰ ميليونه ډالره جايزې اعلان شته دی.
سراج الدین حقاني له عبدالعزیز حقاني او یحیی حقاني سره په افغانستان کې د امریکایي ځواکونو او د هغوی د متحدینو پر وړاندې د خونړیو بریدونو پلان کولو او برخه اخیستلو له امله مطلوب کسان وو.
د سیاسي چارو شنونکي وایي، د بندیزونو لرې کولو تازه ګام ښیي چې ممکن د اسلامي امارت او امریکا تر منځ په ډېپلوماټیک ډګر کې د اړیکو یو نوی فصل پرانیستل شي.
د سیاسي چارو شنونکی معین ګل څمکنی وايي: « هیله ده چې د نورو مشرانو په اړه هم د امریکا حکومت ورته ګام پورته کړي او له تور لېست یې نومونه وباسي؛ ترڅو په دې سره د افغانستان او امریکا ترمنځ یو نوی باب پرانیستل شي او د اړیکو رغولو لپاره اقدام وشي. په دې سره به دواړه هېوادونه وکولی شي چې په ډېپلوماټیکه او سیاسي عرصه کې له یوبل سره نږدې اړیکې وپالي.»
د بنديز لرې کېدو دا ګام په داسې حال کې اخيستل کېږي چې سرپرست حکومت د پنجشنبې په ورځ د جورج ګلیزمن په نامه یو امریکایی وګړی له دوه کلن بند وروسته خوشې کړ.
د بندیزونو له نوملړه د حقاني د نوم لرې کولو په تړاو امریکايي چارواکو تر اوسه څه نه دي ویلي، خو د شنوونکو په اند د دې ډول بحثونو مطرح کېدل څرګندوي چې د ولسمشر ټرمپ اداره سرپرست حکومت ته د تعامل یو ډول لاس غځوي.
د سیاسي چارو شنونکی خلیل احمد نادم وايي: « زه فکر کوم کوم پلاوی چې کابل ته راغی او بل دا چې د سراج الدین حقاني او دوو نورو کسانو نومونه له تور لېست ایستل کېږي، دا یو حسن نیت دی او دا چې امریکايي بندیان خوشې کېږي، دا هم حسن نیت دی. زه اټکل کوم چې راتلونکي کې به د دواړو خواوو ترمنځ اړیکې لاهم ښې شي.»
افغانستان کې له تېرو څه باندې درېیو کالو راهیسې سرپرست حکومت واکمن دی. دغه حکومت د بشري حقونو او په ځانګړي ډول د ښځو د زده کړو او کار د بندیزونو له امله وخت ناوخت له نیوکو سره مخ وي، خو هم مهاله لوېدیځ هېوادونه د بشري حقونو د رعیت پر شرط له اسلامي امارت سره د تعامل خبرې هم کوي.
