د یوې اوونۍ ګرمو بحثونو سره سره بیا هم امریکایان اوطالبان په اوربند هوکړې ته ونه رسېدل.
د سولې په درشل کې په باګرام هوایي ډګر وسله وال برید له دې امله ټکان ورکوونکی و چې امریکایان به د سولې له خبرو په شاه شي چې په دویم ځل یې د ورته یو برید له امله خبرې درولې وې.
د قطر په میز طالبانو ته د اوربند او حکومت سره د خبرو دوه انتخابونه ورکړل شوي چې یو یې باید ومنل شي.
په امریکایي اډه د طالبانو برید په اړه باور کېږي چې د طالبانو نظامي او سیاسي لیکې خپلو کې جوړې نه دي.
خو له دې سره سره دا اندېښنه نه شته چې امریکا به یو ځل بیا د سولې له خبرو اترو په شاه شي.
له امریکا غوښتنه داده چې په طالبانو اوربند او حکومت سره په خبرو زیات فشار رانه وړي چې د سولې پروسې ته ګټه نه رسوي.
د امریکا د بهرنیو چارو وزیر په بګرام هوایي ډګر برید ته په غبرګون کې غوښتنه کړې چې دا ډول بریدونه باید کم شي.
د امریکا د لویو درستیزانو ګډې کمېټې ته مارک مېلي بیا اندېښنه ښوولې چې طالبان به افغان حکومت سره خبرو ته تیار نه شي.
مارک مېلي داسې ویلي (( زما د مالوماتو له مخې طالبان نه غواړي چې په رسمي ډول له افغان حکومت سره خبرې وکړي، ځکه چې افغان حکومت په رسمیت نه پېژني. د افغان حکومت او طالبانو تر منځ رسمي خبرې به و نه شي، ځکه چې طالبان یې نه غواړي. دا به ښه خبره وي چې جګړه پای ته ورسېږي او افغانان له افغانانو سره خبرې وکړي))
خو د امریکا دفاع وزیر وایي، په افغانستان کې د ترهګرۍ ضد اړین او مهم ماموریت لري چې افغانستان یو ځل بیا د ترهګرو په خوندي ځای بدل نه شي چې وروسته په امریکا برید وشي.
د امریکا دفاع وزیر مارک اېسپر داسې ویلي (( موږ ته قوماندانانو ویلي چې امریکا په افغانستان کې نظامي حضور کمولی شي او له دې سره د ترهګرۍ ضد مبارزې ماموریت ته هم دوام ورکولی شي. زه علاقه لرم چې افغانستان کې د خپلو ځواکونو شمېر راکم کړو.))
له دې داسې پایله د تحلیل کوونکو په لاس ده چې د سپینې ماڼۍ او پینټاګون ترمنځ په افغانستان کې د جګړې او سولې پرسر واحد نظر نه شته او دې کار د سولې پروسه پېچلې کړې ده.
