بل خوا بیا د امریکا دفاع وزارت افغانستان اوسنی وضیعت نازک او د اندیښنې وړ بللی او ټینګار کوي، چې د امکان ترحده به په هوايي برخه کې د افغان ځواکونو ملاتړ ته دوام ورکړي.
د پنټاګون ویاند جان کربي وايي: «د افغانستان اوسنی وضیعت په سم لوري نه دی روان، خو افغان امنیتي ځواکونه دا وړتیا لري چې د جګړې ډګر کې برلاسي شي. د هغه صلاحیت له مخې چې موږ یې لرو او په هر ځای او هر وخت کې یې چې امکان وي، موږ به د افغان امنیتي ځواکونو پر ملاتړ هوایي بریدونه کوو.»
د روان وضعیت څارونکي بیا روانه جګړه پېچلې، نیابتي او د نړۍ د زبرځواکو هېوادونو ترمنځ جګړه بولي او په دې باور دي چې د طالبانو او حکومت ترمنځ مذاکرات هم شخړه نه شي حل کولی.
د باور غورځنګ مشر نجیب ازاد وايي: «دا جګړه افغاني جګړه نه ده، د طالبانو او افغان دولت ترمنځ جګړه نه ده، بلکې د سیمې قدرتونو او د امریکا دمتحده ایالاتو ترمنځ د تفاهماتو بحث دی. ترهغې چې دوی په خپلو کې تفاهم ته ونه رسېږي، په بین الافغاني مذاکراتو کې د افغانستان قضیه نه حل کېږي.»
ځینې بیا په دې باور دي، که امریکا وغواړي د افغانستان جګړه په ورځو کې ختمولی شي او زیاتوي، د جنګ او سولې کیلي له واشنګټن سره ده.
د سیاسي چارو شنونکی عزیز معارج وايي: «که امریکا او چارواکي یې په ریښتینې توګه وغواړي، په یوه اوونۍ کې به افغانستان کې سوله ټینګه شي، ځکه جګړه او سوله دواړه د دوي په کنټرول کې دي او ښايي ترسپټمبر پورې د افغانستان سولې پروسه سره راټوله کړي.»
پر امریکا نیوکې دا دي چې د افغانستان په تړاو له دوه درې ادرسونو خبرې کوي او د هر ادرس څرګندونې یې له یوبل سره په ټکر کې دي، چې له دې کار سره یې د افغانستان سیاسي وضیعت پېچلی او مهبم کړی دی.
