یو تن امریکايي ډیپلوماټ وايي:« ما هغوی ته وویل، زه ډېره بښنه غواړم،چې تاسې مو دلته منتظر یا په تمه کړي یاست. که رښتیا ووایم، زه هم د هغوی په څېر ستړی او ناهیلی وم. خو ما له هغوی وغوښتل، چې موږ هم درک کړي،چې څومره په بېړه موږ په دې برخه کې کار کوو او غواړو هرڅه د سیسټم پر بنسټ مخ ته ولاړ شي.»
هغه بنسټونه،چې په ابوظبۍ او دبۍ کې د دوه سترو پنډغالو د میشتو افغانانو غږ یې پورته کړی وايي، په دوی کې خبریالان او قاضیان ش امل دي،چې تر اوسه پورې یې برخلیک څرګند نه دی.
د سولې لپاره د پاڅون بنسټ مشر احمد شاه محبي وايي:« ستونزه دا ده،چې هیڅوک نه پوهیږي،چې څه پیښیږي. د بند پاتې افغانانو ستونزه دا ده،چې هغوی ډېر اوږد او بې برخلیکه انتظار کوي، په بند پاتې کسانو کې، خبریالان، قاضیان او څارنوالان له کورنیو سره دي. په متحده عرب اماراتو کې په دوه بېلابېلو پنډغالو کې د افغانانو شمیر ۱۲ زرو ته رسیږي.»
د اسلامي امارت د کډوالو او بېرته راستنیدوونکو چارو وزارت ویاند عبدالمطلب حقاني بیا د سقوط پر مهال د هغوی وتل غیر قانوني او د نړیوالو اصولو خلاف بولي او د با عزته ژوند لپاره یې بېرته هېواد ته راستنیدل غوره بولي.
حقاني زیاتوي:« د اسلامي امارت د راتګ پر مهال چې کوم هېوادوال له هېواده وتلي او متحده عرب اماراتو او نورو هېوادونو ته تللي دي،اول خو د هغوی دلته تګ د ټولو نړیوالو اصولو خلاف دی او بیا هلته چې دوی لاړل، بې برخلیکه پاتې شول. اسلامي امارت پر دوی غږ کوي،چې بېرته هېواد ته راستانه شي او دلته د حیا او ابرو ژوند وکړي.»
اوس مهال د متحده عرب اماراتو په دوه پنډغالو کې شااوخوا ۱۲ زره افغانان میشت دي،چې ۲۵۰۰ یې د تیر حکومت د صفر یو قطعې ځواکونه یاد شوي دي.
دغه بند پاتي کډوال،چې د تخلیې بهیر په لړ کې وتلي، له تیرو څو اونیو راهیسې د خپل بد وضعیت او امریکا تګ په اړه لاریونونه کوي.
