د امریکا متحده ایالتو دفاع وزارت یا پنټاګون ویاند جان کربي وايي، له افغانستانه د امریکايي پوځیانو له وتلو وروسته به امریکا د دغه هیواد د ګاونډیو هیوادونو له اډو د پوځي عملیاتو لپاره کار واخلي.
خو کربي ونه وویل،چې د کوم هېواد له اډو څخه به کار واخلي.
په همدې حال کې نیویارک ټایمز ورځپاڼې ویلي،پاکستان د امریکا متحدو ایالتونو ته ویلي،د دغه هېواد له اډو څخه کار اخیستی شي،خو په افغانستان کې د هدفونو تر ویشتلو مخکې به د پاکستان پوځ ته معلومات ورکوي.
امریکايي رسنۍ وايي،د بایډن د ادارې چارواکي له پاکستاني چارواکو سره په دې خبرې کوي،چې د افغانستان خاورې ته نژدې د عملیاتو لپاره اډه ورکړي.
امریکا تر ۲۰۱۱ م کال پورې په پاکستان کې اډې لرلې.
په افغانستان کې د امریکا له حضور سره د پاکستان د مخالفت یو دلیل دا و،چې په دې سیمه کې د لوېدیځ لپاره پاکستان خپل ستراتیژیک اهمیت له لاسه ورکړ،خو اوس چې لوېدیځ ځواکونه له افغانستانه وځي،پاکستان هیله لري، یو وار بیا به په سیمه کې پخوانی ستراتیژیک اهمیت ترلاسه او له مرستو به برخمن شي.
