د رویټرز خبري آژانس راپور ورکړی چې د افغان کډوالو د ایستلو پروګرام ریيس شان وېنډیوار د امريکا بهرنيو چارو وزیر ته په استولي ليک کې د افغان کډوالو د ملاتړ غوښتنه کړې.
د روېټرز د راپور له مخې، د ياد ليک جزیيات يې ترلاسه کړي، نوموړي انديښنه ښودلې که امريکا د خپلو افغان محتدينو ملاتړ ونه کړي، نو ښايي د دوی ژوند له جدي ګواښونو سره مخ شي او دا چاره به د ځنيو هېوادونو په راتلونکو جګړو کې د امریکايي ځواکونو باور زيانمن کړي.
د دې اندېښنو پر دوام د امریکا استازو جرګې د بهرنیو اړیکو کمېټې مخکېني رییس مایکل مککال هم له سي.بي.اېس ټلوېزيون سره په مرکه کې غوښتنه کړې، هغه افغانان چې له دوی سره يې په افغانستان کې دنده ترسره کړې، باید اجازه ورکړل شي چې د کډوالۍ ځانګړو وېزو په وسيله امريکا ته لاړ شي.
هغه زیاته کړې:« موږ له دوی سره ژمنه کړې وه، چې د امریکا له پوځ سره د همکاریو په بدل کې له هغوی ملاتړ وکړو. ډېری یې ژباړونکي او سیمهییز کارکوونکي وو چې له موږ سره یې کار کاوه. هغوی د کډوالۍ ځانګړې وېزه (اېس.آی.وي) لري او باید اجازه ورکړل شي، چې له دې لارې امریکا ته د ننوتلو لپاره ترې کار واخلي.»
خو د کډوالو حقونو یو شمېر مدافعان وایي، امریکا ته د تګ په موخه د درېیمو هېوادونو له ډلې یوازې په پاکستان کې څه باندې ۲۵ زره افغانان په تمه دي چې په خبره یې ډېری یې د ګونګ برخلیک له امله له رواني ستونزو سره مخ شوي.
د کډوالو حقونو مدافع ظاهر بهاند وايي:«هغه افغان کډوال چې په پاکستان کې کېسونه لري او د امریکا ته د تګ په تمه دي، له خورا ډېرو ستونزو او کړاوونو سره مخ شوې دي، له یوې خوا د وېزو نه شتون او له بلې خوا د پولیسو ځورونه، دا هغه څه دي چې افغانان ورسره لاس او ګرېوان دي. دا هم باید پر ډاګه ووایم چې له هغې ورځې چې ښاغلي ټرمپ اعلان کړی چې کېسونه دې وځنډېږي، دلته په پاکستان کې خلک له روحي ستونزو سره مخ شوې، ان دوه د ځان وژنې پېښې رامنځته شوې دي.»
د امریکا بهرنیو چارو وزارت ته د لېږل شوي لیک ځواب لا نه دی ورکړل شوی؛ خو د حقوقي چارو یو شمېر شنونکي د کډوالۍ له نړيوالو بنسټونو غواړي چې په درېيمو هېوادونو کې بهر ته د تګ په موخه منتظرو افغانانو لپاره دې ځانګړی پلان جوړ کړي او ستونزو ته دې رسېدنه وشي.
د حقوقي چارو شنونکی اسماعیل ځدراڼ وايي:« دلته پر افغان مهاجرینو باندې هر ځای کې ظلم کېږي، یوازې امریکا نه ده بلکې ټول هېوادونه، هغه که ګاونډي هېوادونه دي او که نړیوال هېوادونه دي، له افغان مهاجرینو سره یې هر وخت ظلم کړی، هر وخت یې پر دوی تشدد کړی او ستونزې یې ورته جوړې کړې دي. که چېرې نړیوال قوانین وي، د مهاجرینو د څار کمېټې وي، که دوی وکولی شي چې د مهاجرینو لپاره داسې یو پلان جوړ کړي، پر یوه داسې پلان باندې کار وکړي چې دوی( مهاجرین) د تل لپاره له ستونزو خلاص شي. فکر کوم امریکا هر وخت له افغان مهاجرینو سره ظلم کوي، د ټولو مسلمانو هېوادونو له مهاجرینو سره ظلم کوي. نو پکار دا ده چې ظلم ورسره ونه شي. د مهاجرنیو نړیوال قوانین چې دي، د هغې په چوکاټ کې ورته سیسټم جوړ کړي او پر هماغه چوکاټ باندې مخته ولاړ شي.»
امریکا کې د ډونالډ ټرمپ له بیا ولسمشر کېدو سره سم په لومړیو اقداماتو کې د درېیو میاشتو لپاره یاد هېواد ته د هغو ۳ زرو کسانو پر پروازونو بندیز ولګېد چې له قطر او البانیا یې امریکا ته د تګ لپاره ټولې پروسې بشپړې کړې وې؛ خو دا چې د انتقال پروسه به بیا کله پیلېږي او په درېیمو هېوادونو کې به د منتظرو افغانانو ستونزو ته څه ډول رسېدنه کېږي، په اړه يې د امريکا حکومت واضيح څه نه دي ويلي.
