د امربالمعروف او نهې عن المنکر وزارت د دوی د محتسبینو له خوا له بشري حقوقو څخه د سرغړاوي په اړه د ملګرو ملتونو مرستندویه ماموریت(یوناما) وروستی راپور له واقعتونو لري بولي.
د دې وزارت مسوولین وايي، د دوی ټول محتسبین د هېواد د قوانینو، شرعي او اخلاقي اصولو او اسلامي قوانینو په رڼا کې خپلې دندې ترسره کوي او هېڅکله د دغو قوانینو په خلاف عمل نه کوي.
د دې وزارت ویاند زیاتوي، د بشر حقوق او په تېره بیا د ښځو او نجونو حقوق د اسلامي او شرعي اصولو په رڼا کې خوندي دي او خلک باید د نړیوالو ادارو په دې ډول راپورونو باور ونه کړي.
د امر بالمعروف، نهې عن المنکر او شکایتونو اورېدلو وزارت ویاند سیف السلام خیبر وايي: « د امر بالمعروف، نهې عن المنکر او شکایتونو اورېدلو وزارت د یوناما د وروستي راپور په اړه چې په کې د نیونو، ناوړه چلن او محدودیتونو په تړاو بې مانا او له حقیقت څخه لرې ادعاوې مطرح شوې دي، له واقعیتونو لرې بولې او په کلکه یې ردوي. زموږ د محتسبینو ټول فعالیتونه د اسلامي شریعت او د هېواد نافذه قوانینو او اخلاقي اصولو پر بنسټ ترسره کېږي. زه په ډاډ سره وایم هېڅ داسې اقدام نه دی شوی.»
دا غبرګون یوه ورځ وروسته له هغې څرګند شوی چې د افغانستان لپاره د ملګرو ملتونو مرستندویه ماموریت(یوناما) د یوه راپور په خپرولو سره د امربالمعروف او نهې عن المنکر وزارت محتسبین د ښځو او نجونو له حقوقو څخه په سیسټماټیک سرغړاوي تورن کړل.
سیف السلام خیبر وايي، د روان لمریز کال په سلواغی میاشت کې د ښځو او نجونو له حقوقو سره تړلې ۳۷۰ دوسیې هوارې شوې د، ۵۳ اجباري ودونو مخنیوی شوی او د کورني تاوتریخوالي ۱۲۸ پېښو مخه نیول شوې ده.
سیف السلام خیبر په دې اړه وايي: « د امر بالمعروف، نهې عن المنکر او شکایتونو اورېدلو وزارت د تېرې مرغومي میاشتې په اوږدو کې د ۵۳ اجباري نکاح ګانو او د ۱۲۸ کورني تاوریخوالي پېښو په ګډون د ښځو د حقونو اړوند ۳۷۲ قضیې حل کړې دي. یاد وزارت ډاډ ورکوي چې د مېرمنو د حقونو خوندیتوب ته ژمن دی او چاته به اجازه ورنه کړي چې داسې کړنې ترسره کړي چې له امله یې د مېرمنو حقونه تر پښو لاندې شي.»
په ورته وخت کې شنونکي بیا دا باور څرګندوي چې د یوناما په ګډون یو شمېر نورې ادارې چې د بشري حقوقو په برخه کې فعالیت کوي، تل د خپلو اهدافو د پلې کولو لپاره دا ډول ادعاوی کوي.
د چارو شنونکی زلمی افغانیار وايي: « له بده مرغه په تېرو ۴ کالو کې د یوناما هر هغه راپور چې د افغانستان په اړه یې خپور کړی، تر ډېره یې مغرضانه اړخ درلود. که چېرې دوی واقعا ً بشري حقونو او انسانیت ته اهمیت ورکوي، د فلسطین د خلکو په اړه څه پیغام لري.»
د امربالمعروف او نهې عن المنکر وزارت د معلوماتو له مخې، د روان کال په تېرو لسو میاشتو کې د ټول هېواد په کچه د ۱ زر ۵۷۰ اجباري ودونو مخنیوی شوی او د ښځو د حقوقو په تړاو شاوخوا ۶ زره دوسیې حل شوې دي.
