امرباالمعروف، نهې عن المنکر او د شکایتونو اورېدلو وزارت د ښځو او نجونو د شرعي حقونو د تامین ډاډ ورکوي.
یاد وزارت د ملګرو ملتونو او نړيوالو سازمانونو هغه راپورونه په کلکه ردوي چې وايي، د افغان ښځو د حقونو او همدا راز د کم عمره نجونو واده کولو په تړاو په کې اندېښنې ښودل شوې دي.
مسوولان يې وايي، اسلامي امارت د افغان مېرمنو ټولو اسلامي او شرعي حقوقو ته ژمن دی او په دې برخه کې جدي هم دي.
د دوی په خبره، تېرو څو کلونو کې یې د زرګونو جبري نکاح کولو مخه نیولې او دغه راز يې د کم عمره نجونو د نکاح مخنیوی هم کړی.
د امرباالمعروف، نهې عن المنکر او شکايتونو اورېدلو وزارت ویاند سیف السلام خیبر وايي: « د ماشومانو د واده کولو په تړاو راپورونه له حقیقت څخه لرې دي. تاسو وینئ چې زموږ وزارت په میاشتني، اوونیز او حتا ورځني ډول هغه ارقام خپروي چې په کې ډېره برخه د ښځو د حقونو اعاده وي، په ځانګړې توګه هغه برخه چې په کې د ښځو د جبري نکاح مخنیوی کېږي، یو له دې هم د ماشومانو واده کول دي.»
په افغانستان کې باور دا دی چې اسلامي امارت د ښځو شرعي حقونو تامین په برخه کې زیاتې لاسته راوړنې لري.
دوی وايي، له تېرو پنځو کلونو راهیسې په افغانستان کې په بدو کې د ښځو د ورکړې او د جبري نکاح پر مخنیوي سربېره یې د ښځو میراث حقونه هم تامین کړي.
د سیاسي چارو شنونکی ادریس محمدي ځاځی وايي: « په بدو کې د ښځو ورکول، په ښځو د لوړ ولور اخستل او په ځانګړې توګه د ښځو جبري نکاح هغه موضوعات دي چې اسلامي امارت په کې ګڼې لاسته راوړنې لري. دا هغه څه دي چې په تېرو کلونو کې د ښځو او نجونو لپاره یو سرخوږی و.»
دیني عالمان هم د کم عمره نجونو او ښځو له رضايت پرته د هغوی نکاح له شرعیت سره په ټکر کې بولي او زیاتوي، کورنۍ باید د خپلو اولادونو نکاح د هغوی په خوښې ترسره کړي.
دیني عالم عبدالمنان ترهخېل وايي: « د شریعت له مخې جبري نکاح او د کوچنیو نجونو واده کول منع دي. دغه شان ودونه د کورنیو لپاره ستونزې زیږوي. ښه دا ده چې د افغانستان خلک له دې ډول واده کولو څخه جدي ډډه وکړي.»
دا هر څه داسې مهال دي چې د امرباالمعروف او نهې عن المنکر وزارت د مسوولانو په خبره، د ښځو جبري نکاح کولو په تړاو يې ځینې کسان نیولي هم دي او په دې برخه کې د اسلامي امارت د رهبر ځانګړي فرامین موجود دي او دوی به یې پر اساس د ښځو ټولو شرعي حقوق ورکړي.
