Skip to content
د اقتصادي چارو یو شمېر پوهان وايي،ډېری افغانان له سخت حالت سره مخ دي او له نړیوالو غواړي،چې د افغانستان کنګل شوې شتمني ازاده کړي.
د اقتصادي چارو کارپوه عبیدالله وايي:« نړیوال دې د مرستو تر څنګ له افغانستانه اقتصادي بندیزونه لرې او کنګل شوې پیسې دې ازادي کړي،چې افغانانو پر خپلو کارونو بوخت شي.»
هېواد کې سږني ژمي کې د بې ځایه شویو او بې وزلو کورنیو ژوند له جدي ګواښ سره مخ دی او په دې تړاو د ملګرو ملتونو کډوالۍ ادارې هم ا ندېښنه ښودلې ده.
یادې ادارې ویلي،په روان ژمي کې ډېری افغانانو بېړنیو مرستو ته اړتیا لري او مرستندویه سازمانونه باید ژر تر ژر بېړنۍ مرستې ورسوي.
د کډوالو او بېرته راستنیدونکو چارو وزارت مرستیال ارسلا خان خروټی بیا وايي،د نړیوالو دغه مرستې بسنه نه کوي او د افغانانو دایمي ستونزې نه شي حل کولای.
خروټی وايي، په مرکز او ولایتونو کې یو شمېر کورنۍ لا هم خپلو اصلي مېنو ته نه دي لېږدول شوي.
خروټي زیاته کړه:« ډېری بې ځایه شوي په بد وضیعت کې ژوند کوي او د پسرلي تر راتګ پورې به دغه کورنۍ خپلو ځایونو ته ولېږدول شي او په دې تړاو سروې روانه ده.»
بل پلو ډېری اړمن کسان بیا نیوکه لري،چې د نړیوالو مرستې ورته نه دي رسېدلي او روان ژمی د خونو ګرمولو لپاره ان سون توکي نه لري .
ملګرو ملتونو اتکل کړی، چې افغانستان کې ۲۳ میلیونه کسان له لوږې سره مخ دي او که بېړنۍ بشري مرستې ونشي، انساني ناورین به رامنځته شي.
