د محمد نذير پکتياوال په نوم افغان کډوال د امريکا کورني امنيت وزارت اړوند د کډوالو او ګمرکونو ادارې له لوري د توقيف پرمهال ساه ورکړې.
د امريکا کورني امنیت وزارت د پکتياوال د مړينې په اړه څه نه دي ويلي، خو امریکا ته د افغان کډوالو د لېږد مرستندویه بنسټ(افغان ايواک) مشر دا پېښه تایيد کړې او وايي، نوموړی له توقیف ۲۴ ساعته وروسته مړ شوی.
د افغان ایواک مشر شان وانډایور ویلي: « ما ته تېره شپه زنګ راغی او راته وويل شول چې یو سړی د کډوالۍ او ګمرکونو ادارې په توقیف خونه کې مړ شوی. یو افغان چې نوم یې نذیر و، د امریکا له ځانګړو ځواکونو سره یې کار کړی و، روزل شوی و او ګڼ ستاینلیکونه یې ترلاسه کړي وو. نذیر د جمعې په سهار د خپلو ماشومانو په وړاندې نيول شوی و، په دې اړه به نور معلومات هم خپاره شي. ما د هغوی له کورنۍ سره خبرې وکړې او ټول ډېر خواشیني دي. دا عادي خبره نه ده چې یو ۴۱ کلن سړی دې مړ شي. یو روغ سړی چې له توقيف کېدو ۲۴ ساعته وروسته مړ شو. موږ به د دې موضوع په اړه خبرې وکړو او اجازه نه ورکوو چې مړینه یې بې ارزښته پاتې شي.»
د ۴۱ کلن محمد نذیز پکتیاوال د هغه جرم په اړه څه نه دي ویل شوي چې نوموړی يې له امله نیول شوی و، خو نذیر د تېرې جمعې په ورځ هغه مهال د پوليسو له لوري ونیول شو چې خپل ماشومان یې ښوونځي ته وړل.
نوموړي په افغانستان کې له امريکايي ځواکونو سره کار کړی و او دامهال يې په امريکا کې د کډوالۍ قضيه څېړل کېده.
د بشري حقونو مدافعان دې پېښې خواشيني کړي او وايي، د توقيف پرمهال د تورن کس روغتيايي وضعيت ته پاملرنه د نوموړي حق دی او د دې اصل په نظر کې نیولو پرته يې د توقيف پرمهال ضايع کېدل، له بشري حقونو سره ټکر لري.
د بشري حقونو مدافع عبدالرزاق عديل وايي: « د محمد نذیر پکتیاوال مړینه د امریکا په کډوالۍ اداره کې د یوې اخلاقي او سیسټماټیکې ماتې ښکارندويي کوي. د امریکا مهاجرتي سیسټم د دې پر ځای چې له خپلو متحدانو د ملاتړ او منندويي له مخې عمل وکړي، د سختګیرانه او بیوروکراټیکو تګلارو له مخې حرکت کوي. په دې ډول حرکت کې د پناه غوښتونکو انساني کرامت د امنیتي تګلارو ښکار ګرځي. دغې پېښې ثابته کړه چې له امریکا سره د کار کولو مخینه لرل، د یوه پناه غوښتونکي د ژوند تضمین نه شي کولی.»
د رویټرز خبري اژانس د راپورونو له مخې، محمد نذير پکتياوال په روان کال کې دوولسم کس دی چې د امریکا کورني امنيت وزارت اړوند د کډوالۍ او ګمرکونو ادارې په توقيف خونه کې مړ کېږي.
