د زابل له بریدو وروسته پر طالبانو د بریدونو د زیاتېدو غوښتنه کېږي.
زابل کې پر افغان پوځ له برید وروسته اوس ټینګار دا دی چې افغان ځواکونه دې له دفاعي حالت تعرضي ته لاړ شي.
تحلیل کوونکي وايي؛ د طالبانو د بریدونو له زیاتوالي سره دې افغان ځواکونه هم خپل عملیات او بریدونه پيل کړي.
له اورکم اونۍ وروسته تردې مهاله افغان ځواکونه په دفاعي حالت کې دي خو طالبانو یوځل بیا خپلو وسله والو ته له افغان ځواکونو سره دجګړې امر ورکړی دی.
له افغان ځواکونو غوښتنه داده چې له دفاعي حالت را ووځي او د جګړې مقابل لوري باندې دې عملیات پيل کړي.
د چارو شنونکی عزیز ستانکزی او ولسي جرګه کې د هلمند استازې نسیمه نیازۍ داسې وايي (( افغان ځواکونه دې له دفاعي حالت را ووځي او تعرضي حالت دې غوره کړي او اجازه دې نه و رکوي چې طالبان دافغان ځواکونو پوستو ته دومره نږدې شي چې په برید کې پوسته سقوط وکړي. نو په کار ده، چې ځکمني او هوايي ځواکونه خپل عملیات زیات کړي او طالبانو ته اجازه ورنکړي چې سیمې ترې ونیسي،،،، هیله مو له حکومت څخه دا ده چې په عملیاتو کې دقیق اوسي او له دفاعي حالت څخه را ووځي.))
تازه په دې تړاو ملي دفاع وزارت څه نه وايي خو وړمه ورځ دغه وزارت په یو پیغام کې ویلي و چې ځواکونه یې دفاعي حالت کې دي.
طالبان بیا د خپلو بریدونو مسؤولیت هم پر حکومت وراچوي او باور یې دا دی چې بریدونو ګراف یې ټیټ ساتلی دی.
طالب ویاند ذبیح الله مجاهد داسې وویل (( هیڅ ډول پرتوکول وجود نه لري چې موږ دې بریدونه نه کوو اوس چې هر څه دي مسوولیت یې بیرته افغان حکومت ته ورګرځي. زموږ بریدونه به دوام ولري خو موږ کوشش کړی چې کچه یې ټیټه وساتو.))
اوس چې جګړه په کم شدت سره بیا پيل شوې او اندیښنه شته چې پراخه به شي، د سولې د پروسې په بریا ټینګار کیږي.
عزیز ستانکزي داسې وویل (( که طالب دا فکرکوي چې ځان به په جګړه کې بریالی کړي او دجګړې میدان به وګټي نو بیا به حکومت په چا کوي ایا په قبرونو به حکومت کوي؟ جګړه د حل لار نه ده طالب مجبور دی چې منتخب حکومت سره که ښه دی او که خراب باید خبرې ورسره وکړي.))
د مالومات پر اساس د طالبانو له لوري پر افغان ځواکونو د ورځې تر دیرشو بریدونه کیږي او تلفات هم لري چې یوازې د جمعې په ورځ زابل کې له پنځه ویشتو زیات افغان سرتیري په کې وژل شوي دي .
