د افغانستان سوداګرۍ او پانګونې خونې رییس د هند له شارژدافیر سره لیدنه کې د دواړو هېوادونو ترمنځ د سوداګریزو اړیکو پر پیاوړتیا خبرې کړې.
په دې لیدنه کې د صادراتي او لوجسټیکي کچې زیاتولو ترڅنګ، د سوداګریزونو تسهیلاتو پر رامنځته کولو او د کرنې، کانونو او لاسي صنایعو په څېر برخو کې د همکاریو پر پراختیا تمرکز شوی.
افغان لوري د دې کار لپاره د سوداګریزو زېربناوو او ګډې همکارۍ د تقویې او سوداګریز توکو ته د ګډو بازارونو پر موندلو ټینګار کړی.
د سوداګرۍ او پانګونې خونې د مطبوعاتو آمر احسان الله احسان وايي: « په دې لیدنه کې د افغانستان او هند ترمنځ د سوداګرۍ پر پراختیا بحث شوی او ترڅنګ یې په دواړو هېوادونو کې د خصوصي سکټور اړوند نهادونو پر پیاوړتیا هم ټینګار شوی. د افغانستان د سوداګرۍ او پانګونې خونې عمومي رییس د دواړو هېوادونو د سوداګرۍ لا پراختیا لپاره ځینې وړانديزونه کړي چې په کې د نویو بازارونو موندل، د سوداګرۍلپاره د زېربناوو تقویه او د ګډې همغږۍ ډېرول په کې شامل دي.»
د هند شارژدافیر بیا د ګډونو نندارتونونو جوړېدو او د وېزو په برخه کې افغان او هندي سوداګرو ته د لازمو اسانتیاوو رامنځته کولو ډاډ ورکړی.
شنونکي وايي، له پاکستان سره د سوداګریزو اړیکو تر پرېکون وروسته په کار ده چې د ګاونډ او سیمې له هېوادونو سره پر بدیلو لارو چارو غور وشي.
د اټکل له مخې، دامهال د هند او افغانستان ترمنځ د سوداګرۍ کلنۍ کچه شاوخوا یو میلیارد ډالرو ته رسېږي چې بېلابېل توکي په کې شامل دي.
د اقتصادي چارو شنونکی عبدالنصیر ریښتیا وايي: « له هندوستان سره د دې ډول سټراټیژیکو اړیکو لرل کولی شي ډېر اهمیت ولري، ځکه چې د هندوستان لوی مارکېټ هغه ځای دی چې موږ کولی شو خپل توکي ور صادر کړو. کله چې زموږ صادرات ډېر شي، دا کولی شي د کار زمینه برابره کړي او له امله یې زموږ هېواد اقتصادي وده وکړي.»
دا داسې مهال ده چې تر دې وړاندې د چنګاښ په ۱۶مه د افغانستان د کرنې، اوبو لګولو او مالدارۍ وزیر عطا الله عمري په مشرۍ افغان پلاوی هند ته تللی و او هلته یې له هندي چارواکو سره د کرنې، مالدارۍ او اوبو لګونې په برخو کې خبرې کړې وې.
په دې لیدنو کې له هندي چارواکو غوښتل شوي وو چې د افغانستان د کرنې په عصري کولو کې همکاري وکړي او د کرنیزو محصولاتو د لېږد رالېږد برخه کې سهولتونه زیات کړي.
