قطر کې یو ځل بیا د طالبانو او امریکا ترمنځ د سولې خبرې پیل شوې.
تیره پنجشنبه زلمی خلیلزاد او سکاټ مېلر له کابل دوحې ته تللي، څو له طالبانو سره په اختلافي مسایلو بحث وکړي.
د ځینو مخالفتونو سره سره د امریکا او طالبانو ترمنځ د خبرو لړۍ روانه ده.
د افغان سولې لپاره د امریکا ځانګړي استازي زلمي خلیلزاد او په افغانستان کې امریکايي ځواکونو عمومي قوماندان سکاټ مېلر له طالبانو سره د لسم پړاو په لومړۍ ورځ څو ساعته د تړلو دروازو تر شا خبرې کړي دي.
ویل کېږي، دغه پټې خبرې د څو ساعتونو لپاره د دواړو لوریو ترمنځ په تخنیکي مسایلو ورټولې وې.
خلیلزاد او سکات میلر داسې مهال له طالبانو سره د خبرو لپاره دوحې ته سفر کړی، چې د امریکا کانګرس د دې هیواد له بهرنیو چارو وزارت غوښتي چې د امریکا او طالبانو ترمنځ د سولې توافق په تړاو دې وضاحت ورکړي.
د طالبانو یو ویاند سهیل شاهین پر ټوېټر لیکلي، (( پرون مو له امریکایې لوري سره دشپي تر دوه نیمو بجو مذاکراتي مجلس در لود او نن ماښام محترم ملا برادر اخند او ورسره هئیت یې له ډاکتر زلمي خلیلزاد، جنرال میلر او د قطر دبهرنیو چارو له وزیر سره ګډ مجلس در لود. دواړه مجلسونه مثبت و او ښه پر مختګ وشو.))
له دې سره امریکا ته د ولسمشر محمد اشرف غني سفر وځنډېده.
ټاکل شوې وه محمد اشرف غني واشنګټن ته لاړ شي، خو د ځینو سرچینو په خبره د افغان سولې په تړاو د امریکا او افغان حکومت ترمنځ د اختلاف له امله دغه سفر ځنډېدلی دی.
سرچینې وایي، دغه پلان شوی سفر تر نامالومې نیټې پورې ځنډېدلی دی.
ټاکل شوې وه، ولسمشر غني له یوه ۱۳ کسیز پلاوي سره واشنګټن ته تللی وای او له ډانلډ ټرمپ سره یې د طالبانو او امریکا تر منځ د تړون پر سر بحث کړی وای.
ارګ د دې سفر د ځنډېدو او یا ترسره کېدو په تړاو جزیات نه دي ورکړي، خو سرچینې وایي، د افغان سولې په تړاو د امریکا او افغان حکومت تر منځ د ګډې اعلامیې پر سر د نظر اختلاف له امله دغه سفر ځنډېدلی دی.
