په پام کې ده چې سبا پنجشنبه به د افغان سولې په اړه مسکو د درې اړخیزې ناستې کوربه وي.
افغانستان کې د روسیې سفارت د خبر له مخې روسیه، چین او امریکا د پنجشنبې په ورځ سره کیني.
کابل کې د روسیې سفارت د اعلامیې له مخې، په دې ناسته کې به د امریکا په استازولۍ د افغان سولې په اړه د امریکا ځانګړی استازی زلمی خلیلزاد او د روسیې په استازېتوب ضمیر کابلوف ګډون وکړي.
اعلامیه لیکي، د درې اړخیزې ناستې تمرکز به په ملي پخلاینې او د امریکا او طالب مرکچي پلاوي ترمنځ په وروستیو خبرو ورټول وي.
روسیه دا ناسته د افغان سولې په اړه د همغږۍ د رامنځته کولو په برخه کې ګټوره بولي.
له افغانستان د ناټو وتل په دغه هېواد کې دایمې سولې سره تړلي دي.
د ناټو ملکي استازی نیکولاس کې له بي بي سي سره ځانګړې مرکه ویلي، له افغانستان د ناټو ځواکونو وتل په دې پورې تړلي دي چې افغانان په خپل منځ کې سیاسي جوړجاړي ته ورسیږي.
نیکولاس کې ویلي، داسې جوړجاړی چې تلپاتې سوله راولي، ناټو هېوادونو ته ډاډ ورکوي چې افغانستان بیا د ترهګرو پټن ځای نه ګرځي.
د ناټو ملکي استازي ویلي، دوی او امریکا افغانستان ته په ګډه راغلي او د ناټو په چوکاټ کې ګډ کار کوي او کله چې وځي هم یو ځای به وځي.
د ګي په خبره ، افغانستان کې د ناټو ماموریت موخه روښانه ده او هغه دا چې افغانستان یو ځل بیا د نړیوالو ترهګرو په پټنځای بدل نه شي.
د خلیلزاد اووم سفر
طالبانو ته نیږدې کسان وايي، ډېر احتمال شته چې طالبان او امریکایان په شپږم پړاو خبرو کې وروستۍ هوکړې ته ورسیږي.
سولې عالي شورا د زلمي خلیلزاد له هڅو د هر کلي تر څنګ وايي، تمه دا ده چې خلیلزاد به په دې سفر کې طالبان بین الافغاني خبرو ته وهڅوي.
د خلیلزاد د هڅو د تر څنګ په سیمه کې هم د افغان سولې د ټینګښت او د واحد نظر د رامنځته کېدو لپاره نوې هڅې د راټوکېدو په حال کې دي.
په پام کې ده چې سبا پنجشنبه امریکا، روسیه او چین د افغانستان د سولې په اړه ګډه دری اړخیزه ناسته په مسکو کې وکړي.
