د طالبانو له لوري رسنیو ته په استول شوي اختریز پیغام کې د طالبانو مشر، هبة الله اخندزاده ویلي،، د سولې په تړاو د امریکا سیاسي او نظامي چارواکو متضادې څرګندونې د سولې په تړاو اندېښنې او د امریکا پر دریځ شک پیدا کوي
طالبانوهمداراز ویلي، په سیاسي ډګر کې یې په نړیواله او سیمه ییزه کچه اړیکې پراخه شوي دي.
په دغه اختریز پیغام کې همدارار راغلي چې په کور د ننه یې هم له سیاسي لوریو او ګڼو سیاسي شخصیتونو سره د راتلونکې په اړه خبرو رغنده پرمختګ کړی .
په دې اختریز پیغام کې همداراز پر ټولو طالبانو غږ شوی چې د اختر په ورځو کې د اولس هوساینې، خدمت او خوندیتوب ته پوره پاملرنه وکړي.
ازبکستان ته د طالبانو سفر
ټاکل شوې چې نن به د طالبانو دسیاسي دفتر مشر ملا عبدالغني برادر ازبکستاني چارواکو سره وګوري.
د طالبانو د سیاسي دفتر ویاند سهیل شاهین پر ټوېټرپاڼه لیکلي چې د ملا برادر په مشرۍ دغه پلاوی د چهارشنبې په ورځ تاشکند ته ورسېد او نن پنجشنبه به له ازبک چارواکو سره وګوري.
سهیل شاهین تر دې وړاندې په یوه بل پیغام کې لیکلي وو چې په قطر کې د امریکا او طالبانو تخنیکي ټیمونه د سولې خبرو پر تخنیکې جزیاتو کار ته دوام ورکوي.
د افغانستان د سولې لپاره د امریکا ځانګړی استازی زلمی خلیلزاد د دوشنبې په ورځ د افغانستان د سولې د خبرو د اتم پړاو په درېیمه ورځ له قطره د هند پر لور ولاړ، څو د ده په وینا، د افغانستان د سولې په اړه له هندي چارواکو سره خبرې وکړي.
له دې سره ناټو وايي، امریکا او ناټو په افغانستان کې تر بل هر وخت د سولې هوکړې ته نږدې شوي دي.
د ناټو سرمنشي ینس سټولټنبرګ د اسټرالیا د سډني په یو انسټیټیوټ کې ویلي، د ناټو متحدین په افغانستان کې سولې ته نږدي شوي، خو نه شي ویلی چې کله به هوکړې ته ورسېږي.
سټولټنبرګ زیاته کړې چې د هوکړې په تړاو ځکه څه نه شي ویلی چې مذاکرات سخت دي.
هغه همدا راز ویلي چې افغانستان ته د ناټو د تګ موخه دا وه چې افغانستان یو ځل بیا د نړیوالو ترهګرو لپاره په یو خوندي ځای بدل نه شي.
