په افغانستان کې د ملګرو ملتونو مرستندویه دفتر یا یوناما مشرې دیبورا لاینز د قطر پلازمېنه دوحه کې د طالبانو له مذاکراتي ټیم سره لېدنه کړې ده.
د یوناما له لوري خپره شوې خبرپاڼه کې راغلي، لاینز د طالبانو له مذاکراتي ټیم سره کتلي دي او پر سوله او روان حالت یې خبرې ورسره کړي دي.
لاینز ویلي،د افغانستان مذاکرات د ملګرو ملتونو له ملاتړ برخمن دي، خو دې اړتیا ده،چې سوله او مذاکرات د جګړو د ختمولو لپاره تر بلې هرې لارې لومړیتوب ولري.
د نوموړې په خبره افغانان سولې ته هېلې لري او دواړو لورو ته په کار ده،چې رښتیني مذاکرات پیل کړي او روانو جګړو ته د پای ټکی کېږدي. د ملګرو ملتونو استازې ټینګار کړی دی،چې افغان جګړه یوازې د خبرو له لارې پای موندلی شي او ښکېلې خواوې باید دا واقعیت ومني.
