خلیلزاد د افغان سولې په تړاو د اووم سفر په ترڅ کې اسلام اباد ته رسېدلی.
د افغان سولې لپاره د امريکا ځانگړى استازى زلمى خليلزاد تیره ورځ اسلام اباد ته رسېدلی او روانه مياشت به قطر کې له طالبانو سره د خبرو بل پړاو پيل کړي.
خليلزاد تمه ښودلی چې دا ځل به طالبانو سره له افغانستان د بهرنیو ځواکونو پر وتلو او د افغان خاورې د بل په ضد نه کارولو موضوع خبرې پای ته ورسوي.
طالب او امريکا دواړو منلې چې په دې برخه کې يو څه پرمختگ شوى، خو پر نورو جزياتو خبرو ته اړتيا شته.
د پاکستان د بهرنيو چارو وزارت ویاند محمد فېصل ویلي، پاکستاني پلاوي له خلیلزاد سره کتلي او د افغان سولې خبرو ترڅنګ يې ورسره پر دوه اړخيزو همکاریو خبرې کړي دي.
محمد فیصل ویلي، پاکستاني پلاوي خلیلزاد ته د لومړي وزیر عمران خان دريځ وړاندې کړی چې پاکستان به د افغان سولې برخه کې د عمل په ګډون د سيمې د امن لپاره د روغې جوړې رول ترسره کوي.
هغه ویلي، خليلزاد، د سيمې د تلپاتې سولې لپاره د پاکستان رول مهم ګڼلی.
د امریکا د بهرنیو چارو وزارت ويلي، د زلمي خلیلزاد دا سفر به دووه اوونۍ دوام ولري چې د می میاشتې په ۳۱ پېل او د جون میاشتې تر ۱۶ به دوام وکړي.
د افغان سولې لپاره د امریکا متحده ایالاتو بهرنیو چارو وزارت ځانګړي استازي زلمي خلیل زاد په تازه ټویټونو کې لیکلي، د افغان سولې په اړه یې خپل نوی سفر پيل کړی دی.
د خلیل زاد په لیکنه ، دې سفر کې به لومړی د افغان سولې په اړه سیمه ییزه او نړیواله اجماع پیاوړې کوي، د داخلي اجماع پر پیاوړتیا به تمرکز کوي او هڅه به کوي چې له طالبانو سره تر دې دمه په خبرو کې دوه مهم موارد چې بحثونه ورباندې شوي وروستي کړي.
هغه د طالبانو د مشر د وروستي پیغام په اړه ویلي، د طالبانو پیغام ښيي چې دوی بین الافغاني خبرو ته لېوالتیا ښودلې خو داسې خبرې هم پکې شته چې د سولې پروسې ته زیان رسولی شي.
د خلیلزاد په خبره امریکا د جګړې د دوام او تاوتریخوالي غوښتونکې نه ده او په دې لټه کې ده، چې ژر تر ژره افغان جګړه پای ته ورسېږي او د سولې خبرې مثبتې پایلې ولري.
ټاکل شوې چې خلیلزاد به افغانستان، بلجیم، جرمني، پاکستان، قطر او متحده عربي اماراتو ته ولاړ شي چې د جون له ۳۱ نېټې پیل کېږي او د جون ۱۶ نېټې به دوام وکړي.
د امریکا بهرنیو چار وزارت لیکلي چې خلیلزاد به کابل کې د افغان حکومت او د مدنې ټولنې له استازو سره د افغان سولې په تړاو خبرې وکړي.
بهرنیو چارو وزارت لیکلي چې خلیلزاد به په بروکسل، برلین، اسلام آباد او ابوظبی کې د افغان سولې د ملاتړ لپاره هڅې وکړي او په دوحه کې به طالب استازو سره د افغان سولې په تړاو خبرې وکړي.
