د افغان سولې په لپاره د امریکا ځانګړي استازي زلمي خلیلزاد کندهار ته د خپل سفر په مهال ویلي، ټول افغانان غواړي د افغانستان په راتلونکي کې ونډه ولوبوي او د هغوی له هڅو باید ملاتړ وشي.
خلیلزاد چې د سې شنبې په ورځ کندهار ته لاړ، تمه لري او غواړي چې د حکومت او طالبانو په ګډون ټول افغانان په دوحه کې سره کېني او دا یې وخت دی چې افغانستان کې سوله ټینګه شي.
هغه ویلي، په خبرو کې باید د ښځو او ځوانانو په ګډون د افغان ټولنې د هرې برخې استازي ګډون ولري.
خلیلزاد ویلي، د سولې خبرو په لومړیو پنځو پړاوونو کې هغه مسایل مطرح شوي چې طالبانو او امریکا پورې اړه لري، خو له دې وروسته پر نورو مسایلو هر ډول بحث کې باید افغان حکومت موجود وي.
د هغه په خبره، تر ټولو مهمه دا ده چې د سولې لپاره پر یوه پلان کار وشي چې د دې پلان له مخې باید لومړی په جګړه کې ښکېلې غاړې یوه سیاسي جوړجاړي ته ورسېږي او اوربند اعلان کړي.
له دې سره داسې راپورونه شته چې اجرایه رییس عبدالله عبدالله به قطر ته لاړ شي او له طالبانو سره به خبرې وکړي.
د ځینو راپورونو پر اساس حکومت چمتو دی چې د مسکو غونډې په دوام قطر کې دویمې ناستې ته عبدالله عبدالله ولېږي.
هلته به عبدالله د یو افغان په توګه له طالبانو سره خبرې وکړي چې څنګه امکان لري دواړه خواوې سولې ته ورسېږي.
تر ډیره ګمان کېږي چې قطر کې بین الافغاني ناسته کې به د طالبانو مشري ملا عبدالغني برادر وکړي.
خو تر اوسه په رسمي توګه اجرایه ریاست په دې اړه څه نه دي ویلي.
