د افغان سولې لپاره د امریکا ځانګړي استازي زلمي خلیلزاد ویلي، له طالبانو سره به د سولې خبرې د جون ۲۹ مه یا راتلونکې اونۍ پيل شي.
خلیلزاد پر ټوېټر لیکلي، چې باور لري ټولې خواوې د سولې د پروسې چټکتیا غوښتنه لري.
خلیلزاد ویلي، (( وروسته له هغه چې افغانستان او قطر ته مې سفر وکړ، په دې پوه شوم چې ټول غواړي چې د افغانستان د سولې پروسه چټکه شي.))
“پاکستان کې د سولې ناسته”
پاکستان، افغانستان کې ستراتیژیک نفوذ نه، بلکې خپلواک او سوله ییز افغانستان غواړي.
د پاکستان د بهرنیو چارو وزیر شاه محمود قریشي ویلي، پاکستان خپلواک او سوله ییز افغانستان غواړي، خو په وینا یې د افغانستان او پاکستان ګډ دښمن هڅه کوي د دواړو هېوادونو خپل منځي اړیکې خرابې کړي.
د شنبې په ورځ پاکستان کې د افغان سولې په تړاو کنفرانس جوړ شو، چې په کې د ځينو افغان سیاستوالو تر څنګ د پاکستان د بهرنیو چارو وزیر شاه محمود قریشي هم ګډون کړی و.
د افغان سولې په اړه دغه درې ورځنی کنفرانس پاکستان کې د لاهور د سولې څېړنیز بنسټ او د جنوبي اسیا د ستراتیژیک ثبات بنسټ لخوا وربلل شوی دی.
ویل کېږي په دغه کنفرانس کې به تر ډېره پر افغان سولې، اقتصادي او سوداګریزو اړیکو او په پاکستان کې د مېشت افغان کډوالو په اړه هم خبرې وشي.
له دې سره ټاکل شوې ولسمشر محمد اشرف غني هم راتلونکې پنجشنبه اسلام اباد ته رسمي سفر وکړي.
