د افغان حکومت ځینو سرچینو بي بي سي سره یو شمېر مالومات شریک کړي، چې پکې پاکستاني پولیس او چارواکي ملامت بلل شوي دي.
ویل کېږي، د قضیې په څېړنو کې پاکستاني پولیس غیر مسلکي چلند کوي او داسې موضوعات مطرح کوي، چې غواړي قضیې ته بل رنګ ورکړي.
مالومات دا دي، چې د یادې پېښې د څېړنو مسؤلین له سلسلې علي خېل په ناسم رواني او فزیکي وضعیت کې تکراري پوښتنې کوي، د هغې له ټپونو او وضعیت څخه عکس اخلي او نور داسې څه نه کوي، چې باید په لومړیو شیبو کې وشي.
پاکستاني چارواکو له دغې پېښې وروسته ویلي وو، چې په دې اړه به جدي څېړنې کوي او تر ۴۸ ساعتونو به خپلې پایلې شریکې کړې، خو له یادې پېښې یوه اوونۍ تېره شوې او لا یې هم بشپړې موندنې نه دي شریکې شوي.
