د امنیتي او دفاعي سکتور ویاند اجمل عمر شینواري نن په کابل کې د یوه خبري کنفرانس پر مهالل وویل، د ولس، ديني علماوو او مدني ټولنو پر غوښتنه او د افغان ځواکونو د مورال لوړولو او د هغوی قربانیو درناوي لپاره یې راتلونکی لوی اختر د ولسمشر له لوري د سر تېري په نوم ونومول شو.
شینواري زیاته کړه:« د افغانستان د ولس، علماوو او مدني ټولنو پر غوښتنه، را روان لوی اختر د سرتېري اختر په نوم وړانديز شوی و، چې له نېکه مرغه د افغانستان حکومت د مشرتابه په ځانګړې توګه د ولسمشر او د وسله وال پوځ اعلی سر قومندان له لوري د ياد وړانديز تود هرکلی شوی.»
شينواری وايي، افغان دفاعي ځواکونه له دفاعي حالته راوتلي او د طالبانو پر وړاندې يې یرغلیز حالت غوره کړی، چې په پايله کې يې په ۲۴ ورځو کې نږدې زر تنه وسله وال وژلي دي.
شینواری وايي:«دفاعي او امنيتي ځواکونه په يو شمېر سيمو کې له دفاعي حالته یرغلیز حالت ته را وتلي دي، چې له امله يې الحمد الله لاسته راوړنې لرو.»
عمر وايي، امريکا ته د ولسمشر د سفر په ترڅ کې چې وسله وال پوځ سره د ژمنه شويو بلک هاک چورلکو له جملې درې يې پرون افغان پوځ ته وسپارل شوې.
هغه زیاته کړه:« د امريکا متحده ايالاتو ته د جلالت مأب ولسمشر او د وسله وال پوځ اعلی سر قومندان له سفر سره سم او د ياد هېواد د هوډ له مخې، پرون درې بلک هاک پوځي چورلکې هوايي ځواک ته وسپارل شوې.»
د امنیتي او دفاعي سکتور وياند خلکو ته ډاډ ورکړ چې د خلکو د ډاډمن امنیت لپاره یې د لوی اختر په شپو ورځو کې پلان جوړ کړی او هېواد وال کولی شي، چې د اختر خوښۍ په ډاډمنه فضاء کې ولمانځي.
