پاکستان له افغانستان څخه مرکزي اسیا ته د سوداګرۍ او ټرانزیت لار غوښتې خو افغان حکومت یې په مقابل کې د ګوادر د خلاصولو غوښتنه کړې ده.
د افغانستان د سوداګرۍ او صنعت وزیر له پرون راهیسې په اسلام اباد کې د سوداګریزو اړیکو پر پراختیا له پاکستاني چارواکو سره پر خبرو بوخت دی.
نثار احمد غوریاني ویلي پاکستان ترې غوښتي چې افغانستان دې د دوی سوداګریزو کاروانونو ته مرکزي اسیا ته د تېرېدو اجازه ورکړي.
افغان لوري بیا غوښتي چې پاکستان دې افغانستان ته له جنوبي اسیا سره د سوداګرۍ لار ورکړي او په تېره له پاکستان سره دې ګوادر بندر د افغان سوداګرو پر مخ پرانیزي.
پاکستاني لوري دا هم ویلي چې ژر تر ژره به د افغانستان، پاکستان او ازبکستان ترمنځ یو تړون لاسلیک شي چې له مخې به یې دغه درې واړه هېوادونه له نړیوال بانک پور اخلي او د درېیواړو هېوادونو ترمنځ به د سوداګرۍ د پراختیا لپاره رېللاره جوړېږي.
