زلمي خلیلزاد افغان حکومت ته ډاډ ورکړی چې طالبانو سره به یې خبرو ته کېنوي.
زلمي خلیلزاد له عبدالله عبدالله سره خبرو کې ډاډ ښودلی چې د سولې خبرو کې هیڅ پټه معامله نشته.
د سولې لپاره د امریکا ځانګړی استازی کابل ته په خپل سفر کې له سیاسیونو سره په جلا جلا کتنو کې د سولې په اړه وروستي پرمختګونه شریک کړي دي.
ولسمشر باور ښودلی چې بهرنی سیاست یې هېوادونو سره په متقابل احترام ولاړ دی او ضدیت نه لري.
باور کېږي چې خلیلزاد غواړي افغان حکومت وهڅوي چې د قطر راتلونکې ناستې ته یو پلاوی ولیږي، اوس حکومت په یو نوي جوړښت کار کوي ترڅو د سولې لپاره پاشلي ادرسونه همغږي کړي.
د خلیلزاد د لیدنو په دوام کې اجرایه ریاست ته ډاډ ورکول شوی چې د سولې خبرو کې کومه پټه معامله نشته.
امریکا دا ځل په جدي توګه له افغان حکومت غوښتي چې یو محور کې ځان سمبال کړي ترڅو بین الافغاني خبرو ته لار پرانستل شي هغه لار چې طالبان تیار نه دي حکومت سره پرې قدم ووهي.
د اجرایه مشر په ګډون یو شمېر سیاسیونو ته بلنه ورکړل شوې چې د قطر په هغه ناسته کې برخه واخلي چې د طالبانو او سیاسیونو له لوري جوړیږي، خو د افغان چارواکو ګډون به د حکومت له ادرس نه بلکې د یو افغان په توګه وي.
