Skip to content
په کابل کې نن چهار شنبه د « ۱۴۰۰ کال د زمري پر ۲۰ مه» یو شمېر سیاسي ښځينه فعالانو او د جمهوریت مرکچي ډلې غړو د یوه خبري کنفرانس پر مهال وویل، افغان حکومت او طالبان د جګړې پر مهال نړیوال قوانین نه مراعت کوي.
دوی د جګړې پر دواړو خواوو غږ وکړ چې د جګړې پر دوام دې نور له خلکو قرباني نه اخلي او د تاسیساتو له ویجاړۍ دې لاس واخلي.
قطر کې افغان حکومت مذاکراتي پلاوي غړې فوزیه کوفي وايي: «عامه تاسیساتو زیان لیدلی دی او ان ډېریو ته یې چاودنه ورکړل شوې ده. ځینې ځایونه د امنیتي ځواکونو د بمبارۍ له امله زیانمن شوي. تاسو کندز کې د بازار د تخریب شاهدان یاست او په ټوله کې ملکي کسانو ته پام نه کېږي.»
د سولې مذاکراتي پلاوي دغې غړې نیوکه وکړه چې طالبان په خپلو ژمنو نه دي درېدلي او تر خپل حاکمیت لاندې سیمو کې یې ښځې له خپلو حقونو محرومې کړي دي.
کوفي زیاته کړه: «افغان حکومت بېلابېل نړیوال کنوانسیونه منلي او ژمنتیا یې ښودلې ده. طالبانو هم په خپلو خپرپاڼو کې او زموږ سره ناستو کې ویلي، افغان ښځې د اسلامي اصولو په مراعت کولو سره ازاد ژوند کولای شي، خو له ډېریو سېمو موږ ته د بد وضعیت او د طالبانو له بد چلنده خبر راکول کېږي.»
د کډوالو وزارت د مالوماتو له مخې، د جګړې له امله ۶۰ کورنۍ بې ځایه شوي او دا مهال بېړنیو مرستو ته اړتیا لري.
په دې ناسته کې ښځينه سیاسي فعالانو له طالبانو غوښټنه وکړه چې دجګړې سیمو کې بې ځایه شویو ته د مرستو رسولو لپاره زمینه برابره کړي او د انساني ناورین مخنیوی دې وکړي.
سیاسي فعاله فاطمه مسعود وايي: «د جګړې له ښکېلو اړخونو غواړو چې د بشري مرستو فرصت له خلکو نه وانخلي او اجازه ورکړي، ترڅو ښځې لکه د نورو انسانانو پر څېر، زده کړو، روغتیا، کاروبار او نورو حقونو ته لاسرسی ولري.»
ښځينه سیاسي فعالانې او د مذاکراتي پلاوي غړي داسې مهال دغه اندېښنې څرګندوي چې طالبانو د لسګونه ولسوالیو تر نیولو وروسته د لس ولایتونو مرکزونه سقوط کړي او په نږدې پنځلس نورو ولایتونو کې سختې جګړې روانې دي.
