افغان ماشومان چې د بې وزلۍ له امله د سړک په سر کار کوي وايي، له نړیوالو غواړي غږ یې واوري او لاسنیوی یې وکړي.
دوی وایي، افغان ماشومان زده کړو او خوړو ته اړتیا لري، نه د سړکونو په سر کار کولو ته.
بسم الله هغه ماشوم د، چې له کندزه کابل ته راغلی او دلته د سړکونو په سر کاغذونه ټولوي وایي، اسلامي امارت دې د دوی پلرونو ته د کار کولو زمینه برابره کړي،ترڅو دوی د کار پر ځای زده کړو ته مخه کړي.
بسم الله وايي:« دلته کاغذونه ر ټولوم،نو له اسلامي امارته مو هېله دا ده،چې زموږ پلرونو ته د کار زمینه برابره کړي، ترڅو موږ اړ نه شو،چې کار وکړو، بلکې موږ حق لرو،چې مکتب ووایوو او درس ووایو. دا حق نه لرو،چې پر سړکونو کاغذونه ټول کړو.»
په دې ماشومانو کې یوه د شیوا په نوم هغه نجلۍ ده،چې د سړکونو پر سر د خلکو بوټونه رنګ کوي او هره ورځ خپلې کورنۍ ته نفقه برابروي.
دا وایي پلار یې ناروغ دی او وروڼه یې تر دې کوچني دي،نو ځکه اړه شوې،چې لاس پر کار شي.
شیوا زیاته کړه:« زه بوټونه رنګ کوم او د ورځې تر ۱۰۰ افغانۍ پیدا کوم،چې د پنځوس ډوډۍ اخلمه، تر ماښامه کار کوم، بیا کور ته ځمه.»
اخوا بیا د افغان ماشومانو او ځوانانو لپاره د موسکا ډلې په ۱۵۰ بې وزله ماشومانو هغه چې د سړکونو پر سر کار کوي، ژمني لباسونه ووېشل.
دوی وایي، د دې کار لپاره یې پر کوردننه او بهر ۱۱ سوه کاناډایي ډالر او ۵۰۰۰۰ افغانۍ راټولې کړي وې او هڅه کوي، دا لړۍ دوامداره وساتي.
د افغان ماشومانو او ځوانانو لپاره د موسکا ډلې غړی احسان الله بیټنی وايي:« نن چې موږ کوم پروګرام لرو،ماشومانو ته د ژمنیو لباسونه وېشنه ده او ۱۵۰ ماشومانومو ټاکلي دي او په دوه ډوله مو ورته مرستې راټولې کړي،چې پر کرښه او ښار کې د اعلاناتو په نشرولو سره.»
د افغان ماشومانو او ځوانانو لپاره د موسکا ډلې یو بل غړی افراسیاب عربزاده وايي:« تر دې دمخه مو په پرورشګاه کې ماشومانو ته تعلیمي برنامې درلودې او کمپاین مو ورته کاوه. سږ کال مو هم وغوښتل،چې ماشومانو ته کار وکړو.»
د افغان ماشومانو او ځوانانو لپاره د موسکا ډلې غړي وايي،په دغه ژمنیو لباسونو کې خولې، جامپر، دست کشې، جرابې او جاکټ شامل دي.
