د افغاني سرې میاشتې ټولنې چارواکو په یوې خبري ناسته کې وویل، تردې دمه یې زرګونه د هغو ماشومانو درملنه کړې چې زړونه یې سوري و او زرګونه نور تر درملنې لاندې دي.
دغه راز دوی زیاتوي، په تیرو شپږو میاشتو کې یې له پنځه زره زیاتو رواني ناروغو ته روغتیايي خدمات وړاندې کړې چې ښځې هم په کې شاملې دي او همدا راز زرګونه نور تر درملنې لاندې دي.
د دوی په خبره، له هڅو سره یې ګڼ شمیر رواني ناروغان روغ شوي او خپلو کورنیو ته یې سپارلي دي.
د افغاني سرې میاشتې ټولنې ویاند مدثر همراز وايي:« تر دې مه په زرګونه داسې ناروغان د افغاني سرې میاشتې په مصارفو باندې تداوي شوې. په کال کې تر یو زر او ۵۰۰ یا ۲ زرو پورې ناروغان افغاني سره میاشت تداوي کوي. اوس په زرګونه داسې ناروغان له افغاني سرې میاشتې سره ثبت دي چې هغه به په خپل نوبت سره په کوردننه داخلي روغتونونو ته معرفي کېږي او درملنه به یې کېږي.»
د افغاني سرې میاشتې ټولنې مرستیال عزیز الرحمان وايي:« د رواني مرکزونو له لوري په تېرو شپږو میاشتو کې ۵ زره او ۳۹۹ نارینه او ښځینه رواني ناروغانو ته په رواني مرکزونو او خپلو کورونو کې د رواني روغتیا اړوند خدمات وړاندې شوې او لاهم یو زر او ۱۲۱ رواني ناروغان په یادو مرکزونو کې او ۴ زره او ۲۷۸ رواني ناروغان په خپلو کورونو کې تر درملنې لاندې دي. دغه راز په یاده موده کې یو زر او ۸۹۶ رواني ناروغان روغ شوې او بېرته له ټولنې سره یو ځای شوې دي.»
د یادې ټولنې چارواکي وايي، د کابل په ګډون ګڼ شمیر ولایتونو کې مرستونونه لري چې دمګړي په کې څه باندې ۵۰۰ بې وزله کسان اوسیږي.
دوی زیاتوي، دغو کسانو ته بېلا بېلې حریفوي زده کړې هم ورکوي او ماشومانو ته یې د دیني زده کړو ترڅنګ عصري علوم هم تدریس کیږي.
دافغاني سرې میاشتې ټولنې په تیرو شپږو میاشو کې نږدې ۴ زرو کسانو ته په ټنونو خوراکي او غیر خوراکي توکې وېشلي او همد راز ۵ زره او ۵۰۰ بې وزلو کورنیو سره یې د ۱۶۵ میلیونو افغانیو نقدې مرستې کړې دي.
د افغاني سرې میاشتې ټولنې مرستیال عزیز الرحمان وايي:« اوس مهال ۵۹۷ بې سرپرسته، یتیمانو،کونډو، لوړ عمرلرونکو او ناچاره هېوادوالو ته په کې د ژوند ټولې اسانتیاوې په پام کې نیول شوې. د هغوی د ځان بسیاینې او ټولنې سره بېرته د یو ځای کېدو په موخه هغوی ته حرفوي زده کړې، لکه خیاطي، غالۍ اوبدل، ګلدوزي او همدا ډول د یاد داخلي مشمولینو کورنیو ماشومانو ته په ښوونیزو مرکزونو کې د دیني ښوونې ، ساینسي مضامینو، کمپيوټر، ملي او نړیوالو ژبو په برخو کې د زده کړو زمینه ورته برابره شوې.»
د افغاني سرې میاشتې ټولنې ویاند مدثر همراز وايي:« په تېرو شپږو میاشتو کې ۴ زره او ۳۶۲ تنو ته ۳۸۶ ټنه خوراکي او غیر خوارکي توکي د هېواد په بېلابېلو ولایتونو کې وېشل شوې دي، لکه کابل، هلمند، جوزجان، فاریاب، کندوز، بلخ، بغلان،بادغیس، غور او داسې نورو ولایتونو کې په شپږو میاشتو کې دغه مرستې ترسره شوې. همدا راز د ژمي په رارسېدلو سره ۵ زره او ۵۰۰ اړمنو کورنیو ته چې ۱۶۵ میلیونه افغانۍ کېږي، هر کور ته ۳۰ زره نغدي ورکړل شوې.»
یادې خیریه ټولنې د کورنیو چارو وزارت او ګڼ شمیر نورو ادارو په مرسته له ۱۰۰ زرو زیات سوالګر راټول کړي چې په خبره یې له ۲۰ زرو زیات یې مستحق پیژندل شوي.
