افغانستان کې تیر کال د ګوزڼ یوویشت مثبتې پېښې ثبت شوي دي.
افغانستان کې تېر کال د ګوزڼ یوویشت مثبتې پېښې ثبت شوي چې د روغتیا وزارت د روغتیا نړیوال سازمان اندیښنې یې زیاتې کړي.
د ګوزڼ پېښې هغو سیمو کې رامنځ ته شوي چې طالبانو پکې د پولیو واکسینو اجازه نه ده ورکړې، خو د روغتیا وزارت اوس توانیدلی چې د اته سوه زره پاتي ماشومانو څخه شپږ سوه زره یې واکسین کړي.
روغتیا وزارت له درې ولایتونو پرته ټول افغانستان کې سرتاسري کمپاین پيلوي چې نږدې لس میلیونه ماشومان واکسین کړي.
د ګوزڼ تازه پېښه چې په د ارزګان په چارچینو ولسوالۍ کې ثبت شوې، په ټول افغانستان کې د ګوزڼ د پېښو شمېر ۲۱ ته ورسید چې انديښنې یې زیاتې کړي دي.
دا پېښې یا هغو سیمو کې ثبت شوي چې طالبانو کور په کور د واکسین اجازه نه ده ورکړې او یا تازه راستانه شوي کورنیو ماشومان دي.
اوس د روغتیا وزارت په پام کې لري چې له دایکندي، بامیان او غور ولایتونو پرته ټول افغانستان کې نهه اعشاریه درې میلیونه ماشومان واکسین کړي.
د روغتیا نړیوال سازمان چې په دې برخه کې د روغتیا وزارت مالي ملاتړی او همکار دی، ژمنه کوي چې د افغانانو لاسنیوي ته به دوام ورکړي.
د روغتیا نړیوال سازمان استازي ریچارد پیپر کورن داسې ویلي (( تېر کال د پولیو پېښې زیاتې وې او سږکال هم د پولیو درې مثبتې پېښې ثبت شوي چې ډیری سویلي ولایتونو کې دي. سږکال مو هغو ولایتونو ته لومړیتوب ورکړی چې د پولیو پېښې په کې زیاتې دي))
دیني عالمان هم له کورنیو غواړي چې پولیو واکسین خپلو اولادونو ته وکړي چې د فلج له ګواښ وژغورل شي.
روغتیا وزارت په پام کې لري چې هغو سیمو کې کور په کور واکسین و نه کړي چې طالبان یې اجازه نه ورکوي، طالبان د واکسینو له رضاکارانو غواړي چې کور په کور ونه ګرځي او یو جومات او یا دیره کې واکسین وکړي.
