په کابل کې د کورونا وبا ناروغانو لپاره تر ټولو ستر روغتون افغان جاپان کې دا مهال له ۱۵۰ زیات ناروغان بستر دي او د نورو د بسترولو ظرفیت نه لري.
دغه راز په رغتونونو کې د کورونا وبا ناروغانو ته د اړتېا وړ اکسیجن ترلاسه کول هم ستونزمن شوي،ځکه د اکسیجن کارخونې ورته په وخت او ارزانه بیه اکسیجن نه رسوي.
په کابل کې د یوه ناروغ پایواز وايي: « ما د اکسیجن یوه ډبه په ۲۱ زره افغانۍ وپېرله. اوس په بازار کې په همدې بیه پلورل کېږي. دوی د خلکو له اړمنتوبه استفاده کوي. »
په کابل کې د افغان جاپان روغتون چې د کورونا وبا ناروغانو لپاره په طبي وسایطو سمبال روغتون بلل کیږي د ناروغانو په دیرېدو سره د اکسیجن له کمښته اندښنه لري.
د یاد روغتون مشر زلمی رشتین وایي، اکسیجن ورته په وخت نه رسیږي او پر داسې پلان کار کوي،چې تر یوې کچې د اکسیجن تولید ولري.
رشتین زیاته کړه: « که چېرې زموږ د اکسیجن پلان بشپړ شي، که ناروغان زیات هم شي، له ستونزو سره به مخ نه شو. خو وېره مو شته، که اکسیجن راونه رسېږي، ښايي له ستونزو سره مخ شو. »
بل خوا په کابل کې د اکسیجن د کارخونو مسوولین خبریالانو ته د مرکې لپاره نه حاضریږي او د خلکو شکایتونه پر دغو کارخونو دا دي،چې اکسېجن ورته په ټاکلي وخت نه شي رسولی.
د اکسېجن پر تولیدي فابریکو دا تورونه او شکونه هم شته،چې یو شمېر کسان په قاچاق ډول له شرکتونو د اکسیجن ډبې بازار ته وباسي او په لوړه بیه یې پلوري، هغه څه چې د اکسیجن تولیدي فابریکو مسوولین یې په تړاو نه غواړي خبرې وکړي.
د روغتیا وزارت د مالوماتو له مخې، په هېواد کې پر کورونا وبا د اخته کسانو شمېر له ۱۰۰ زرو لوړ شوی او ۴ زره او ۳۰ تنه ترې مړه شوي دي.
کورونا وبا د لومړي ځل لپاره د ۲۰۱۹ زېږدیز کال په ډسمبر میاشت کې د چین مرکزي هوبي ولایت په ووهان ښار کې پیدا شوه.
د امریکا متحده ایالتو جان هاپګنز پوهنتون د شمېرو له مخې، ټوله نړۍ کې پر کورونا وبا د اخته کسانو شمېر له ۱۷۷ میلیونو لوړ شوی او څه باندې ۳.۸۵ میلیونه کسان ترې مړه شوي دي.
