افغانستان کې د نجونو پرمخ د پوهنتونونو تړلو پرېکړې په اړه د غبرګونونو دوام 

په افغانستان کې د نجونو پوهنتونونو تړلو په اړه د ا.ا وروستۍ پریکړې ته د کورنیو او نړیوالو غبرګونونو په  دوام د حزب اسلامي مشر انجنیر ګلبدین حکمتیار او نړیوالو غبرګونونه ښ،دلي دي.

د حزب اسلامي مشر ګلبدین حکمتیار ویلي، دا ډول پریکړې د افغانستان پر زیان دي او د هېواد یو نسل تباه کوي.

د ترکیې بهرنیو چارو وزیر مولود چاووش اوغلو بیا ویلي، اسلام د پوهې او زده کړو پلوي دی او په زده کړو کې د افغانستان لپاره هېڅ زیان نشته دی. 

دغه راز اوغلو ویلي دي،چې  دا پریکړه نه انساني او او نه هم اسلامي ده.

اوغلو زیاته کړې:«د ښځو پر زده کړو بندیز نه انساني دی او نه اسلامي. د ښځو په زده کړو کې څه تاوان دی؟ افغانستان ته یې څه تاوان رسیږي؟ آیا په دې اړه اسلامي دلیل شته؟ اسلام د زده کړو ضد نه دی، بلکې خلک هڅوي چې زده کړې وکړي.» 

بل خوا د نړیوالو زده کړو په برخه کې د ملګرو ملتونو ځانګړي استازي ګورډن براون د اسلامي امارت دا پرکړه غندلې او ویلي دي،چې دا د  هغوی له خوا پر ښځو د محدودیتونو لړۍ دوام دی.

ګورډن براون ویلي،دا ډول پریکړې د افغانستان په اوس او راتلونکي ژور اغیز کوي.

براون زیاته کړې:«افغانستان کې د تېر شل کلن حضور له امله لویدیځ نشي کولی پر طالبانو فشار راوړي ځکه، دا د نړۍ د اسلامي هېوادونو مشرانو مسوولیت دی چې طالبانو ته ووایي چې دا پریکړه د اسلام سره په ټکر کې ده. ټولو اسلامي هېوادونو د ملګرو ملتونو هغه نوښت منلی چې تر ۲۰۳۰ کاله به ټول ماشومان زده کړو ته لاسرسی ولري.» 

افغانستان لپاره د امریکا ځانګړي استازي توماس وېسټ هم اسلامي امارت ته په خطاب کې ویلي،چې لا هم ناوخته نه دی او د نجونو زده کړو په اړه دې د افغانستان خلکو غوښتنو ته غوږ ونیسي.

وېسټ زیاته کړې:«ټوله نړۍ د طالبانو ورانونکې پریکړې په اړه د  افغانانو یووالی ګوري. محصلین له خپلو خویندو سره اوږه په اوږده دریږي، استادان استعفاوې کوي، لاریونونه کیږي او خلک غوسه دي. له طالبانو غواړو،چې هغوی ته غوږ ونیسي.» 

له دې مخکې د الازهر پوهنتون مشر، د سعودي عربستان بهرنیو چارو وزیر او د اسلامي هېوادونو نورو چارواکو هم د اسلامي امارت دا پریکړه غندلې وه او د هغې د بېرته اخېستلو غوښتنه یې کړې وه.