تېر کال افغانستان کې پنځلس زره کسانو د سرطان ناروغۍ له امله خپل ژوند له لاسه ورکړی دی.
افغانستان له هغو هیوادونو څخه شمېرل کیږي چې د سرطان د ناروغۍ کچه پکې ورځ تر بلې زیاتیږي.
د سرطان ناروغۍ لپاره ځانګړیو روغتیایي مرکزونو او د عامه پوهاوي کموالی هغه لاملونه دي چې پر سرطان د اخته کسانو شمېر یې زیات کړی.
سرطان سره د مبارزې بنسټ په باور خصوصي سکتورونو تر دې دمه په دې برخه کې د پام وړ پانګونه نه ده کړې.
پر سرطان د نړیوالې ادارې د څېړنو مالومات ښيي، ډېری کسان د سینې، سږو او معدې پر سرطان اخته کیږي چې لامل یې پر روغتیایي سکتورونو کې د امکاناتو نشتون په ګوته شوی.
افغانستان کې د سرطان پر وړاندې د مبارزې بنسټ وایي، که د سرطان ناروغي مخه و نه نیول شي نو د مرګ ګواښ به زیات شي.
د افغانستان لپاره د اروپایي ټولنې سفیر وایي، تېر کال افغانستان کې پر سرطان د اخته کسانو شل زره قضیي ثبت شوي چې پنځلس زرو یې خپل ژوند له لاسه ورکړی.
په افغانستان کې د اروپایي ټولنې سفیر پيري مایدون داسې وویل (( افغانستان کې په ۲۰۱۸ کال کې ۲۰ زره د سرطان قضیې ثبت شوې دي. د دغې تخمین پر بنسټ ۱۵ زره کسان د سرطان ناروغۍ له امله مړه شوي .دلته د سرطان د قربانیانو شمیر ځکه زیات دی چې روغتیايي سکتورونه ورته رسیدګي نه شي کولای، وسایل کم دي او خدمات هم کمزوري دي))
سرطان سره د مبارزې بنسټ تر دې دمه پینځه سوه زره کسانو ته د سرطان ناروغۍ په تړاو عامه پوهاوی ورکړی خو وایي چې په دې برخه کې دې روغتیایي مرکزونه زیات شي.
اروپایي ټولنه بیا وایي په دې برخه کې حکومتي مرستې او همکارۍ ډېرې ضرور دي.
