د پيټر او باربارا رېنولډز په نامه دوه تنه بریټانوي اتباع چې د افغانستان د قوانين نقض کولو په جرم له اسلامي امارت سره بندیان وو، له قضايي پروسې وروسته له بنده خلاص شول.
د اسلامي امارت د بهرنیو چارو وزارت ویاند عبدالقهار بلخي وايي، دغه بریټانوي اتباع د قطر په منځګړیتوب بریټانوي چارواکو ته سپارل شوي.
عبدالقهار بلخي پر اېکس پاڼه لیکلي: « د افغانستان اسلامي امارت د اتباعو مسایلو ته له سیاسي او یا د معاملې له زاویې نه ګوري. هیله ده چې د اتباعو مسايل، خصوصاً هغوی ته د کونسلي خدماتو وړاندې کېدل، له سياسي ملاحظاتو پرته تضمين شي او افغانان هم چې هر چېرته وي، کونسلي خدمات ورته ورسیږي.»
دغه ۸۰ او ۷۶ کلن بریټانوۍ جوړه چې ښځه او خاوند دي، له تېرو شاوخوا اتو میاشتو راهیسې په افغانستان کې بندیان وو. د اسلامي امارت حکومت د تېر کال په فبروري کې ونیول.
د اسلامي امارت چارواکي وايي، پیټر او باربارا د قطر په منځګړیتوب له بنده خوشي او د بریټانیا حکومت ځانګړي استازي ته سپارل شوي دي. د اسلامي امارت د بهرنیو چارو وزارت ویاند په دې اړه د قطر له حکومت مننه کړې او زیاتوي: « همداراز په دې تړاو د قطر د ورورهېواد د منځګړيتوب له رښتينو هڅو او تسهيل څخه هم مننه کوو چې د بریټانیا له ځانګړي استازي ريچارډ لېنډزي سره راغلي وو او ياد بریټانوي اتباع ورته وسپارل شول.»
د قطر د حکومت یوه چاوراکي ویلي، خوشي شوي بریټانویان به خپل هېواد ته تر لېږدولو وړاندې د طبي معایناتو لپاره قطر ته ولېږدول شي.
