د عامي روغتیا وزارت سرپرست مولوي نورجلال جلالي اوس په ايران کې دی او د سفر په لړ کې يې له ایرانې چارواکو سره د لیدنې ترڅنګ له یو شمېر روغتونونو، پوهنتونونو او د طبې وسایلو له یوه نندارتون لیدنه کړې.
د عامې روغتيا وزارت چارواکي وايي، په دې لیدنو کې دواړو لوریو یو بل سره د بشپړي همکارۍ، د روغتیايي کارکوونکو د روزلو او په افغانستان کې د ماشومانو ناروغیو درملنې له دولتي روغتونونو سره د دوه اړخیزو همکاریو په موخه د هوکړه لیک په اړه بحث او خبرې کړې.
د عامې روغتیا وزارت په دې اړه وايي: « د عامې روغتیا وزارت سرپرست مولوي نور جلال جلالي ایران ته د خپل رسمي سفر په ترڅ کې د ماشومانو ناروغیو درملنې طبي مرکز او حکیم د ماشومانو ناروغیو درملنې روغتون له مسوولینو سره په دوو جلا غونډو کې لیدنه وکړه. د یادو روغتونونو مسوولینو د افغان روغتیايي کارکوونکو د روزلو او په افغانستان کې د ماشومانو ناروغیو درملنې له دولتي روغتونونو سره د هوکړه لیک چې له مخې به یې په بېلا بېلو برخو کې تجربې شریکي او د دوه اړخیزو همکاریو لار پرانیستل شي، د ژمنتیا ډاډ څرګند کړ.»
د عامې روغتیا وزارت چارواکي وايي، جلالي په تهران کې د فوق تخصص په پروګرامونو کې په زده کړو بوختو افغان متخصصینو سره لیدلي او د هغوی وړاندیزونه او ستونزې يي اورېدلې دي.
په ورته مهال، ډاکټران وايي، افغانستان د روغتیا په برخه کې زیاتې ستونزي لري او یوازي د ایران په مرستو دا ستونزي نه شي حل کېدلی.
دوی وايي، ایران دې د افغان ډاکټرانو د روزنې ترڅنګ د طبې وسایلو او باکیفیته درملو مرستې وکړي.
ډاکټر قاضې زاده وايي: « اوس په دې تخنیکي وسایل او اقتصاد باندې کار نه کېږي، ترڅو چې له بهرنیو هېوادونو سره اړیکه ونه شي او په ځانګړې توګه داسې وخت کې چې د عامې روغتیا وزارت سرپرست ایران تللی او په دې برخه کې هڅه کوي، نو خدای دې وکړي چې دا هڅه یې رنګ راوړي. ډېر کله د کاغذ پرمخ ژمنې کېږي خو عملي کېږي نه.»
یو شمېر نور ډاکټران بیا وايي، ایران دې روغتیا په برخه کي د ظرفیت لوړونې لنډ مهاله او اوږدمهاله پروګرامونه برابر او په هېواد کې د شته تخصصي برخو لا پراختیا ته زمینه برابره کړي.
ډاکټر احمدزی مخلص وايي: « موږ په طبي برخه کې ډېرو وسایلو او ماشینرۍ ته اړتیا لرو؛ په ځانګړي توګه زموږ دولتي روغتونونه او سکټور دغه شان وسایلو ته ډېر اړمن دی، لکه سټي سکن، اېم.آر.آی او نور ماشیونونه چې باید کار وشي او چمتو شي.»
د عامي روغتیا وزارت د چارواکو په خبره، د افغانستان او ایران ترمنځ د روغتیا د برخې همکاریو د پراختیا لپاره یو ښه فرصت رامنځته شوی او د دواړو لورو پانګه وال باید له دې فرصت مثبته ګټه واخلي.
