د سرپرست حکومت چارواکو په وار وار له رسنیو سره په خبرو کې ویلي چې د افغانستان خاوره به د هېڅ هېواد په زیان ونه کارول شي او د دې تر څنګ يې د داعش او نورو ډلو پر وړاندې د حکومت مبارزه بریالۍ بللې.
تازه د امریکا د ملي اطلاعاتو سازمان له لوري په خپاره شوي کلني راپور کې افغانستان د هغو هېوادونو له ډلې ایستل شوی چې د امریکا امنیت، اقتصاد او سوداګرۍ ته ترې زیان پېښېدای شي.
خو یاد سازمان د یو شمېر هغو هېوادونو نومونه بيا په ډاګه کړي چې په راتلونکي کې ترې امریکا ته د خطر پېښېدو احتمال شته.
د راپور یوه برخه کې راغلي: « روسیه، چین، ایران او شمالي کوریا هغه څلور هېوادونه دي چې د امریکا لویو او ملي ګټو ته د ګواښ احساس ترې کېدلی شي. زموږ موندنې ښیي چې دا څلور هېوادونه هڅه کوي او همدارنګه کولی شي د امریکا لویو ګټو ته جدي ستونزې جوړې او بریدونه پرې وکړي. دوی هڅه کوي چې د امریکا سوداګري، مالي او امنیتي وضعیت له ننګونو سره مخ کړي.»
د امریکا ملي اطلاعاتو سازمان دې هېواد او ملي ګټو ته یې د اسلامي امارت غړي داسې مهال د ګواښ پېښوونکو له ډلې ایستلي چې د زندانيانو وروستیو تبادلو له امله د امریکا او سرپرست حکومت اړیکې عادي کېدونکې ښکاري.
دې راپور کې په سویلي آسیا کې د پاکستاني طالبانو تحریک، لښکر طیبه او نورو ډلو فعاليت په اړه اندېښنه ښودل شوې، خو د داعش او القاعدې په اړه څه نه دي ویل شوي.
په ورته مهال، د سیاسي چارو کارپوهان وايي، د امریکا او افغانستان په اړیکو کې وروسته له هغې نرمښت ښکاره شو چې امریکايي پلاوي کابل ته سفر وکړ او د کورنیو چارو وزارت سرپرست پر سر يې وضع کړې ۱۰ میلیونه ډالر جایزه لغو کړه.
د سیاسي چارو شنونکی اخترمحمد راسخ وايي: « د امریکا د کړنو او پرېکړه څېره بدله شوه، د طالبانو له خوا چې کوم امریکايي تبعه له زندان څخه خوشې او د باور جوړونې لپاره په تحفه کې ورکړل شو، دا خپله د امریکا او طالبانو ترمنځ د راکړه ورکړې او ښو اړیکو او دغه راز پروګرامونو د عملي کولو لپاره ګامونه اخیستل دي او ثابتوي چې امریکا غواړي له طالبانو سره ښه روابط ولري.»
د سیاسي چارو شنونکی توریالی ځاځی وايي: « ګورئ! امریکا اوس په دې ښه پوهېږي چې دېکتاتورانه او جنایتکارانه سیاستونه نور په نړۍ کې نه شي عملي کولی. دا ځکه چې په تېرو څو لسیزو کې امریکا په افغانستان او منځني ختیځ کې د بشریت ضد جنایتونه ترسره کړل، دا نور نړیوالو ته د منلو وړ نه دي. د امریکا دېکتاتوري مخ په ختمېدو ده.»
سرپرست حکومت د امريکا له يادې پرېکړې په هرکلي سره د داعش پر وړاندې خپله مبارزه بریالۍ بولي او وايي، دغه ډله يې په بشپړ ډول ځپلي او وبه نه شي کولي د امریکا په شمول نورو هېوادونه ته ګواښ پېښ کړي.
له دې وړاندې د امریکا په ګډون د نړۍ هېوادونو سرپرست حکومت سره د رسمي اړیکو پیل د نجونو او ښځو بشپړو حقونو ته په درناوي، ټولګډونه حکومت جوړولو، نورو هېوادونو ته د ګواښ نه پېښېدو او د دوحې تړون پر ژمنو درېدلو پورې مشروط کړی دی.
