په دې وروستیو کې افغانستان ته د بهرنیو سیلانیانو پام زیات شوی او يو شمېر یې چې افغانستان ته راغلي، له بېلا بېلو ولایتونو يې لېدنه کړې.
یوه اسټرالیایۍ سیلانۍ چې په لومړي ځل افغانستان ته راغلې، د بامیان او بلخ په ګډون یې له يو شمېر ولايتونو لېدنه کړې او د خپل سفر په اړه خوښي څرګندوي.
دغه سېلانۍ وایي، افغانستان ته د سفر پرمهال له هېڅ ستونزې سره نه ده مخ شوې او په دې سفر سره یې د افغانستان په اړه شته ټولې اندېښنې ختمې شوي دي.
اسټرالیایۍ سیلانۍ پاریس وايي:« زه له هېڅ کومې ستونزې سره مخ نه شوم او فکر کوم همدا اوس د سفر او له افغانستان څخه د لېدو لپاره تر ټولو غوره فرصت وه. هو! زه دلته ډېر ښه احساس کوم او ټولو خلکو را سره ښه چلن کړی. ما واقيعا له دې سفر خوند واخېست او که حقیقت ووایم په لومړي سر کې مې اندېښنه درلوده، خو په اصل کې دا زما د ژوند یو غوره سفر وه. د افغانستان په اړه دلته ډېر څه شته، نه یوازې خلک یې بلکې طبعيي ښکلا یې زړه راښکونکې ده او ما دلته ډېر ښه وخت تېر کړ.»
پاریس وایي، دنده یې دا ده چې افغانستان ته خلک د سفر لپاره وهڅوي. د هغې په خبره، افغانستان ته په سفر کولو سره ورته څرګنده شوې، چې په بهر کې د افغانستان په تړاو خپاره شوي مالومات منفي او بې ځایه دي.
پاریس زیاته کړه:« زه له یوه شرکت سره کار کوم او خلک دې ته هڅوم، چې افغانستان ته لاړ شي او موږ خپله خلک دلته راولو؛ ځکه افغانستان له هغه څه زیات دی، چې موږ يې په خبرونو کې وینو او په تړاو یې اوازې خپرې دي. موږ غواړو چې ټول خلک دا هر څه خپله وویني. نو زه له نورو غوښتنه کوم چې دلته راشي؛ ځکه موږ دا فرصت پیدا کړ، چې حقیقي افغانستان ووېنو. زه ډېره زیاته خوشحاله یم او دا چې زه دلته راتللی شم نو هر څوک کولی شي.»
دغه راز پاریس وایي، له ګڼو جګړو ځپلو هېوادونو یې لېدنه کړې خو افغانستان یوازېنی هېواد دی، چې د امن احساس یې په کې کړی دی.
پاریس وايي، افغانستان ته تګ یې یو ارمان وه او دا چې امن دی نو بیا به هم راشي.
هغې زیاته کړه:« هو! بلکل زه باور لرم او غواړم ووایم چې ما منځني ختیځ کې ډېر کار کړی او داسې سیمو کې مې کار کړی دی چې سخته جګړه په کې وه. له مالي څخه نیولې تر سوریې اوعراق پورې، خو دلته راتګ راته یوه تجربه شوه او زه د نورو هېوادونو پرتله دلته زیات د آرامۍ احساس کوم. دلته په راتلو د حیرانتیا حس کوم ځکه یو ارمان او خوب مې په حقیقت بدل شو. زه د امن احساس کوم او غواړم بیا هم دلته راشم.»
د اسلامي امارت له واکمنیدو وروسته ګڼو هېوادونو افغانستان ته په خپلو اتباعو د سفر بندیزونه لګولي او یو شمېر ملکي بهرنیان د ناامنۍ په پلمه ووتل، خو بهرني سیلانیان د ناامنۍ په تړاو راپورونه حقیقت نه بولي او وایي، هر څوک په ډاډه زړه افغانستان ته سفر کولی شي.
