د کرنې، اوبو لګولو او مالدارۍ وزیر نوي ډهلي ته په سفر وتلی او هلته به د هند سوداګریزې ټولنې له غړو سره وګوري، ترڅو د کرنې، اوبو لګولو، مالدارۍ، پانګونې او نورو ګډو ګټو لرونکو برخو کې د همکارۍ په اړه خبرې وکړي.
د کرنې، اوبو لګولو او مالدارۍ وزارت له خوا د ورکړل شویو معلوماتو له مخې، مولوي عطاءالله عمري د سې شنبې په ورځ نوي ډهلي ته رسېدلی.
د دې وزارت د مسوولینو په خبره، مولوي عطاءالله عمري به د خپل سفر پرمهال، د دواړو هېوادونو ترمنځ د کرنې، اوبو لګولو او مالدارۍ په برخه کې د همکاریو پراخولو او همداراز د کرنیزو محصولاتو د راکړې ورکړې په تړاو خبرې وکړي.
د کرنې، اوبولګولو او مالدارۍ وزارت ویاند مولوی شېر محمد حاتمي وايي: « دا سفر د کرنې، اوبو لګولو او مالدارۍ، د کرنیو محصولاتونو د صادراتو او وارداتو، تجاربو تبادلې، د کرنیزې ټېکنالوژۍ کارولو په برخو کې د همکاریو زیاتونو په موخه ترسره کېږي.»
بله خوا، د هند دولتي ټلویزیون «دور درشن» په نوي ډهلي کې د افغان سفارت په حواله ویلي چې ښاغلی عمري به د بهرنیو چارو وزارت د یوه پلاوي په ملتیا، له خپلو هندي سیالانو سره په دوه اړخیزو همکاریو هم خبرې وکړي.
په راپور کې د هند بهرنیو چارو وزارت ویاند، ریندر جیسوال په حواله لیکل شوي چې هندي لوری به له عمري سره د ګډو ګټو پر موضوعاتو رغنده خبرې ولري.
د هند دولتي ټلویزیون د راپور یوه برخه کې راغلي: « د افغانستان د کرنې، اوبو لګولو او مالدارۍ وزیر مولوي عطاءالله عمري ته چې نوي ډهلي ته را رسېدلی، تود هرکلی وایو. د ګډوګټو پر موضوعاتو د اغېزمنو خبرو اترو په تمه یو.»
دا سفر په داسې حال کې ترسره کېږي چې د دواړو هېوادونو ترمنځ بشري همکارۍ دوام لري او د جون په ۱۷مه، هند افغانستان ته د خپلې بشري مرستې په چوکاټ کې پنځه ټنه اړین درمل ولېږل.
د راپور له مخې، تر دې وړاندې د جون په ۱۱مه، د هند د بهرنیو چارو وزارت اعلان وکړ چې د افغانستان روغتیايي ادارو ته یې د دې هېواد د روغتیايي سیسټم د پیاوړتیا لپاره طبي تجهیزات ډالۍ کړي دي.
تر دې مخکې، د عامې روغتیا، صنعت او سوداګرۍ وزیرانو هم هند ته سفرونه درلودل او په خپلو کاري ساحو کې یې د دواړو هېوادونو ترمنځ د همکاریو پراخولو په تړاو اغېزناکې خبرې کړې وې. کتونکي بیا د کرنې، اوبو لګولو او مالدارۍ په برخه کې د هند تجربې خورا بډایه بولي او وايي، هند په سیمه کې یوازینی هېواد دی چې افغانستان سره د کرنیزو محصولاتو له پلوه پرځان بسیاینې برخه کې ګټوره همکاري کولی شي.
د چارو شنونکی نقیب الله شهاب وايي: « هندوستان چې د بڼوالۍ، مالدارۍ او کرنیز سکټور په برخه کې څومره پرمختګونه کړي، که په دغو برخو کې د افغانستان له کرنې وزارت سره همکاري وکړي، د افغانستان د کرنې او مالدارۍ برخې به ورسره ډېره وده وکړي.»
همدارنګه، د هند بهرنیو چارو وزارت په جلا توګه د افغانستان د خلکو د هوساینې په اړه د خپلې ژمنتیا د بیا تایید ترڅنګ ویلي، نوی ډهلی لا هم د دوامداره بشري مرستو، پرمختیایي همکاریو او د ظرفیت لوړونې د پروګرامونو له لارې په افغانستان کې د سولې، ثبات او پرمختګ ملاتړ ته ژمن دی.
د دور درشن راپور کې د ملګرو ملتونو د امنیت شورا په غونډه کې د هند د دایمي استازي له خولې ویل شوي چې هند او افغانستان ګاونډي او لرغوني تمدن لرونکي هېوادونه دي او د دوی ترمنځ اړیکې د پېړیو اوږد تاریخ لري. هغه زیاته کړې چې هند د خوړو خوندیتوب، روغتیايي او درملیزو مرستو ترڅنګ، افغانانو ته د بورسونو او ظرفیت لوړونې فرصتونو برابرولو له لارې هم خپل ملاتړ ته دوام ورکوي.
