د کرنې، اوبو لګولو او مالدارې وزارت د معلوماتو له مخې، د کرنې وزیر په مشرۍ تللی افغان پلاوی به په دې سفر کې له بېلاروسي چارواکو سره د دواړو هېوادونو ترمنځ د شته اړیکو د پیاوړي کولو او د ګډو همکاریو لپاره د نویو فرصتونو پر رامنځته کولو خبرې وکړي.
د مولوي عطاالله عمري په مشرۍ دغه ۱۳ کسیزه پلاوی به د افغانستان او بېلاروس د اقتصادي همکاریو او سواګرۍ د ګډ کمیسون په دویمه غونډه کې هم ګډون وکړي او د دې هېواد د کرنیزو ماشین آلاتو له تولیدوونکو کارخونو به لیدنه وکړي.
د ورکړل شویو معلوماتو له مخې، دا غونډه به پنځه ورځې دوام وکړي او په کې به دواړه لوري د ګډو اقتصادي او سوداګریزو ګټو په برخو کې هم د همکاریو پر فرصتونو بحث وکړي.
د کرنې وزارت د خبرپاڼې په خپرولو سره وايي: « افغان پلاوی به د خپل سفر پر مهال له بېلاروسي چارواکو سره د دواړو هېوادونو ترمنځ د اقتصادي او سوداګریزو همکاریو پر پراختیا، د اقتصادي اړیکو پر پیاوړتیا او د ګډو همکاریو لپاره د نویو فرصتونو پر رامنځته کولو خبرې وکړي.»
د یاد وزارت د خبر له مخې، افغان پلاوې د بېلاروس په رسمي بلنه دې هېواد ته تللی. د کرنې وزارت دا نه دي ویلي چې افغان پلاوې دې غونډې ته کومه ځانګړې اجنډا له ځانه سره لري او که څنګه؟
بله خوا، اقتصادي شنونکي بیا د چم ګاونډ ټولو هېوادونو سره د اقتصادي او سوداګریزو اړیکو د پراختیا غوښتنه کوي او وايي، ټول هغه هېوادونه د افغانستان لپاره مهم دي چې د سوداګرۍ او اقتصادي همکاریو په برخه کې تړونونه لري.
بېلاروس هم د سیمې په مهمو هېوادونو کې شمېرل کېږي او کتونکي وايي، د افغانستان اقتصادي بیارغونې په برخه کې مهم رول لوبولی شي.
د دوی په خبره، دا اوس د افغان پلاوي په مهارتونو تړلی ده چې په څه ډول د دې هېواد لا پراخه همکاري جلبولی شي.
د اقتصادي چارو شنونکی، محمد عیسی مبارز وايي: « موږ باید د دې سفر پرمهال له بېلاروس څخه په هغو برخو کې همکاري وغواړو چې دوی یې هوارولی شي. په دې اړه بحث کول د افغانستان په ګټه دي؛ خو که له موږ سره داسې غوښتنې او پلانونه وي چې دوی یې د هوارولو توان نه لري، دا سفر به ګټه ونه لري.»
افغانستان له یو شمیر نورو هېوادونو سره هم د ګډو اقتصادي همکاریو او سوداګرۍ ګډ کمېسیونونه لري چې تر ډېره په کې پر دوه اړخیزو سوداګریزو او اقتصادي همکاریو خبرې کېږي.
د کرنې وزارت د معلوماتو له مخې، په دې ۱۳ کسیز پلاوي کې د صنعت او سوداګرۍ وزارت مرستیال، د ټرانسپورټ او ملکي هوايي چلند، مالیې او بهرنیو چارو وزارتونو، د دولتي شرکتونو او د اقتصادي چارو لپاره د ریاستالوزرا مرستیال د دفتر استازي شامل دي.
