د کابل، اسلاماباد او بېجينګ استازي د شريکو مسايلو پر سر د بحث لپاره کابل کې راټول شوي.
دغه درې اړخيزه ناسته داسې مهال ترسره کېږي چې د کابل او اسلام اباد ترمنځ اړيکې د سياسي او سوداګريزو مسايلو له امله نورمال نه دي او ترڅنګ يې هند او پاکستان له يوه بل سره په جګړه بوخت دي.
د بهرنیو چارو وزارت وایي، په دې ناسته کې د افغانستان، چین او پاکستان د بهرنيو چارو وزيرانو د ډيالوګ پنځمې ناستې د موضوعاتو پر تعقیب او راتلونکو ورته ناستو لپاره يې د بحث وړ موضوعاتو باندې خبرې شوې دي.
د ياد وزارت سرپرست مولوي امیر خان متقي له افغانستان سره د چين او پاکستان اړیکې مهمي بللې او هیله یې ښودلې چې په دې اړه د شویو ژمنو له امله به د درې واړو هېوادونو په اړيکو کې پرمختګونه راشي.
د بهرنیو چارو وزارت مرستیال ویاند ضیاء احمد تکل وايي:« د هېواد بهرنیو چارو وزیر له افغانستان سره د دواړو هېوادونو سیاسي او اقتصادي اړیکې مهمي وبللې او هیله یې وښوده چې په راتلونکي کې هم په دغو برخو کې ښه پرمختګونه وشي.»
د ښه ګاونډيتوب پر اساس د اړيکو پراختيا هغه ژمنه ده چې په دې درې اړخيزه ناسته کې د چین او پاکستان استازو افغانستان ته ورکړې.
د دې ترڅنګ، پر دې هوکړه شوې چې پر شريکو مسايلو د لا روښانه بحثونو لپاره به د چين، افغانستان او پاکستان د بهرنيو چارو وزيرانو درې اړخيزه راتلونکې ناسته هم په کابل کې ترسره کېږي.
د بهرنیو چارو وزارت مرستیال ویاند په دې اړه وايي: « دغه راز په ناسته کې د چین او پاکستان ځانګړو استازو افغانستان سره د ښه ګاونډیتوب او متقابل احترام پر اساس د اړیکو د لا پرمختګ ژمنه وکړه. همداراز، د بحثونو په نتیجه کې لوریو توافق وکړ چې د درې واړو هېوادونو د بهرنیو چارو وزیرانو ډيالوګ شپږمه ناسته به په کابل کې دایرېږي او هم به د افغانستان د ګاونډیو هېوادونو د بهرنیو چارو د وزیرانو د راتلونکې غونډې لپاره امادګي نیسي.»
بل پلو، د افغانستان لپاره د پاکستان ځانګړي استازي محمد صادق خان ویلي، د افغانستان، پاکستان او چين لومړنۍ درې اړخېزه ناسته کې د اقتصاد، امنیت او سیمې د ثبات په تړاو په ګډو همکاریو خبرې وشوې.
خان زیاته کړې:« نن په کابل کې د بهرنيو چارو وزير اميرخان متقي په کوربه توب د پاکستان، چین او افغانستان درې اړخیزه لومړنۍ ناسته وشوه چې پر اقتصادي او امنیتي همکاریو او همدارنګه د سیمه يیز ثبات په اړه يې د نظرونو د همغږۍ لپاره فرصت برابر کړ.»
د سیاسي چارو شنونکي په دې ناسته کې شوې ژمنې مثبې ارزوي او وړانديز کوي چې درې واړه هېوادونه دې د اختلافاتو حل، د شکونو له منځه تللو او د متقابل پوهاوي پیاوړتیا لپاره داسې کړنلاره ایجاد کړي چې له مخې يې ياد هېوادونه خپلې ستونزې د باور په فضا کې د خبرو له لارې حل کړي.
پخوانی ډېپلوماټ عزیز معارج وايي:« نه په کار ده چې د ملي ګټو پر بنسټ او د یوه تدبیر او مکانېزم له مخې، له دوی سره خبرې اترې او اړیکې وشي او لیدل شي چې آیا د دوی کړې ژمنې واقعا ً عملي کېږي کنه د پخوا په څېر خپلې پالیسۍ او سیاستونه مخکې وړي، بیا هم له افغانستان سره دوکه کوي یا یې استعمالوي؛ دا بیا د افغانستان پر ګټه نه دي.»
له دې وړاندې هم څو ځله د افغانستان، پاکستان او چين ترمنځ د بهرنيو چارو وزيرانو پر کچه درې اړخيزې ناستې شوې دي چې اجنډاوې يې د درې واړو هېوادونو ترمنځ د سوداګرۍ او سياست پر اړوند مسايلو ورټولې وې.
د شنونکو نيوکه په ځانګړې توګه پر پاکستان له دې کبله ده چې په يادو ناستو کې يې د همکاريو په اړه کړې ژمنې نه دي عملي کړې او تل يې د شريکو مسايلو هوکړو ته د خپلو ګټو له زاويې کتلي.
