د ایران د سړکونو او ښاري پراختیا وزارت وايلي، دا نوښت کولی شي نړیواله سوداګري اسانه او په سیمه کې د دوامدارې اقتصادي ودې لپاره زمینه برابره کړي.
یاد وزارت وړاندې ویلي، د دری واړو هېوادونو چارواکو د ایران په مشهد ښار د غونډې پرمهال د ټرانزیټي دهلېزونو پر فعالولو، د سوداګریزې راکړه ورکړې پر زیاتولو او د سیمه ییزې همکارۍ پر پراختیا هم خبرې کړې.
د «ټرېنډ» خبري اژانس د راپور له مخې، د ټرانزیټ او د سړک له لارې د سوداګریزو مالونو د لیږد په اړه دا درې اړخیزه غونډه کولی شي په سیمه کې د نوو لوجسټیکي لارو د پراختیا لپاره یو مهم پرمختګ وي.
د راپور په یوه برخه کې راغلي: « دا همکاري د مرکزي اسیا له هېوادونو سره د اړیکو د پراخولو او د خپل ټرانزیټي ظرفیت د اغېزناکې ګټنې لپاره د ایران له پراخې سټراټیژۍ سره همغږي لري.
ایران په وروستیو کلونو کې د شمال – سوېل نړیوال ټرانزیټي دهلېز (INSTC)، د چابهار بندر، د ختیځو سرحدي لارو او د اورګاډي پټلۍ په پروژو کې خپلې پانګونې زیاتې کړې دي، ترڅو ځان د سیمې د یوه مهم ټرانزیټي مرکز په توګه مطرح کړي.»
راپور کې دغه راز ویل شوي چې د دری واړو هېوادونو چارواکو د جولای په ۱۴مه او ۱۵مه د ایران په مشهد کې غونډه کړې او په کې د سړک له لارې د سوداګریزو مالونو د لېږد په برخه کې د دری اړخیزو همکاریو پر پیاوړتیا خبرې شوې.
راپور کې راغلي، دا غونډه د درېیو هېوادونو د ګډو ظرفیتونو د اغېزناکې استفادې، د سیمهییزو اړیکو د پیاوړتیا، په نړیوالو ټرانزیټي دهلېزونو کې د سیمې د رول د لوړولو او د ټرانزیټي زېربناوو د پراختیا په لور، یو مهم ګام بلل کېږي.
راپور کې وړاندې ویل شوي چې له افغانستان او تاجیکستان سره د سړک له لارې د سوداګریزو مالونو د لېږد پراختیا کولې شي د ایران له دې سټراټیژۍ سره مرسته وکړي.
افغان اقتصادي شنونکي هم دا غونډه مهمه بولي او وايي، که په دې تړاو شوې پریکړې عملي شي، نو نه یوازې د سیمې په کچه به د سوداګرۍ او ټرانزیټ په برخه کې موجود محدودیتونه له منځه ولاړ شي بلکې افغانستان به هم وکولی شي د سیمې په کچه خپله سوداګري پراخه کړي.
د اقتصادي چارو شنونکی عبدالنصیر رښتیا وايي: « د تجارت او ټرانزیټ له پلوه د سیمې په هېوادونو کې د افغانستان رول ډېر مهم، ارزنده او برجسته دي. همدا لامل دی چې هم د مرکزي اسیا هېوادونه، هم ایران او هم هند او چین هڅه کوي داسې لارې پيدا کړي چې د افغانستان له لارې دغه هېوادونه سره وصل شي.»
دا غونډه داسې مهال کیږي چې افغانستان هم د سیمې له هېوادونو سره د سوداګریزو او اقتصادي اړیکو د پراخولو لپاره پراخې هڅې پیل کړي دي.
دا هڅې وروسته له هغې لا چټکې شوې چې د کابل او اسلام اباد ترمنځ سوداګریزې اړیکې له منځه لاړې.
د شنونکو په خبره، افغانستان تر ډېره په خپلو دغو هڅو کې بریالی و او د منځنۍ اسیا له ډېرو هېوادونو سره یې سوداګریزه راکړه ورکړه په بې ساري ډول پراخه شوې ده.
