د امریکا متحده ایالتونو د بهرنیو چارو وزارت وايي، د هغو افغانانو لپاره یې د ځانګړو ویزو بهیر ګړندی کړی، چې په افغانستان کې یې د امریکایي ځواکونو او یا هم د امریکا حکومت لپاره کار کړی وي.
د یاد وزارت ویاند نېډ پرایس وايي، دې پروګرام ته یې امکانات نور هم ډېر کړي دي.
پرایس زیاته کړې، په تېرو څو میاشتو کې د دې ویزو د غوښتنلیکونو د طی مراحل لپاره په واشنګټن کې د کار کوونکو شمېر هم ډېر شوی دی.
د نوموړي په خبره، یوازې په تېره میاشت کې له ۸۰۰۰ اضافي ځانګړو ویزو لپاره له کانګرسه د بودیجې غوښتنه شوې ده.
هغه وايي، له افغانستانه د بهرنیو ځواکونو تر وتلو وروسته به هم په کابل کې د امریکا سفارت پرانیستی وي او په غوښتنلیکونو به کار کوي.
